लोकतंत्र मिरर
नांदेड (जिल्हा प्रतिनिधी) : सार्वजनिक आरोग्य विभागाच्या रुग्णालयांसह प्राथमिक आरोग्य केंद्रे व उपकेंद्रांमध्ये पुरेसा कर्मचारी वर्ग उपलब्ध नसल्यामुळे रुग्णांची मोठी गैरसोय होत आहे. त्यामुळे आरोग्य यंत्रणेतील सर्व रिक्त पदे तातडीने भरावीत, अशी मागणी भोकर विधानसभा मतदारसंघाच्या आमदार श्रीजया चव्हाण यांनी सोमवारी राज्याचे सार्वजनिक आरोग्य मंत्री प्रकाश आबिटकर यांच्याकडे केली.
आरोग्यमंत्री प्रकाश आबिटकर यांची राज्यव्यापी आरोग्य संवाद यात्रा सुरू असून, नांदेड जिल्ह्याच्या दौऱ्यादरम्यान त्यांनी सोमवारी लोकप्रतिनिधी व अधिकाऱ्यांची ऑनलाइन बैठक घेतली. या बैठकीत सहभागी होऊन माजी मुख्यमंत्री तथा खासदार अशोकराव चव्हाण आणि आमदार श्रीजया चव्हाण यांनी आरोग्य विभागाशी संबंधित विविध प्रश्नांकडे आरोग्यमंत्र्यांचे लक्ष वेधले.
यावेळी आमदार श्रीजया चव्हाण यांनी भोकर विधानसभा मतदारसंघातील भोकर, मुदखेड आणि अर्धापूर या तालुक्यांमधील आरोग्यविषयक समस्या मांडल्या. त्या म्हणाल्या की, सध्या सोनोग्राफी मशीनचा वापर प्रामुख्याने गर्भवती महिलांसाठीच मर्यादित राहिला आहे. मात्र, इतरही अनेक आजारांच्या अचूक निदानासाठी ही चाचणी आवश्यक असल्याने इतर गरजू रुग्णांनाही ही सुविधा उपलब्ध करून द्यावी. याशिवाय, डायलिसिस केंद्रासाठी नियमित पाणीपुरवठा सुनिश्चित करणे, रुग्णालयांच्या नियमित साफसफाईसाठी कंत्राटदार नियुक्त करणे, जैववैद्यकीय कचऱ्याच्या विल्हेवाटीसाठी दाहक यंत्र (इन्सिनरेटर) उपलब्ध करून देणे आणि येळेगाव येथील प्राथमिक आरोग्य केंद्रासाठी तातडीने निधी मंजूर करण्याची मागणी त्यांनी केली.
माजी मुख्यमंत्री तथा खासदार अशोकराव चव्हाण यांनीही या बैठकीत महत्त्वाचे विषय उपस्थित केले. विष्णुपुरी येथील डॉ. शंकरराव चव्हाण शासकीय वैद्यकीय महाविद्यालय व रुग्णालयाला ‘सुपर स्पेशालिटी’चा दर्जा देण्याचा प्रस्ताव राज्य शासनामार्फत केंद्र सरकारकडे पाठवण्यात आला असून, त्यासाठी राज्य शासनाने ठोस पाठपुरावा करावा, असे ते म्हणाले. यासोबतच भोकर येथील उपजिल्हा रुग्णालयासाठी आवश्यक निधी देऊन प्रलंबित काम लवकरात लवकर पूर्ण करणे, भोकर येथील शासकीय नर्सिंग कॉलेजच्या प्रस्तावाला मंजुरी देणे आणि सर्वच उपजिल्हा व ग्रामीण रुग्णालये तसेच आरोग्य केंद्रांमध्ये पुरेसा कर्मचारी वर्ग उपलब्ध करून देण्याच्या मागण्याही त्यांनी यावेळी केल्या.
