लोकतंत्र मिरर
नागपूर, सतीश तोडासे ( प्रतिनिधी ): वायसीसीई, नागपूर येथील इलेक्ट्रिकल अभियांत्रिकी विभागांतर्गत कार्यरत असलेल्या ‘स्पार्क क्लब’तर्फे १६ सप्टेंबर रोजी ‘सर्किट क्राफ्ट – आर्डिनो बेस्ड किट मेकिंग वर्कशॉप’ या आर्डिनो-आधारित किट निर्मिती कार्यशाळेचे आयोजन करण्यात आले. या कार्यशाळेत ८० विद्यार्थ्यांनी उत्साहाने सहभाग घेतला.
प्रत्यक्ष कृतीतून शिकण्यावर भर देत सैद्धांतिक ज्ञान आणि प्रत्यक्ष अंमलबजावणी यांमधील दरी सांधणे हा कार्यशाळेचा मुख्य उद्देश होता. विभागप्रमुख डॉ. एस. पी. गावंडे यांच्या हस्ते कार्यशाळेचे उद्घाटन झाले. विद्यार्थ्यांच्या सर्वांगीण विकासासाठी अशा कार्यशाळांची आवश्यकता असल्याचे त्यांनी यावेळी सांगितले. यावेळी व्यासपीठावर स्पार्क क्लबचे मार्गदर्शक डॉ. ए. पी. मुनशी आणि विद्युत क्लबचे मार्गदर्शक प्रा. पी. एस. शेटे उपस्थित होते. सहभागी विद्यार्थ्यांनी जोड्यांमध्ये काम करून आर्डिनो-आधारित किट्सची जुळवणी आणि प्रोग्रामिंग केले. यातून विद्यार्थ्यांना सर्किट निर्मिती, इलेक्ट्रॉनिक घटक, आर्डिनो प्रोग्रामिंग, वायरिंग आणि मूलभूत समस्या निवारणाचा प्रत्यक्ष अनुभव मिळाला.
दोन सत्रांमध्ये आयोजित या कार्यशाळेमुळे विद्यार्थ्यांना प्रयोग, सहकार्य आणि समस्या निवारणाची व्यावहारिक कौशल्ये विकसित करण्यासाठी व्यासपीठ मिळाले. आयोजन समितीने संपूर्ण प्रक्रियेदरम्यान विद्यार्थ्यांना मार्गदर्शन केले. त्यामुळे प्रकल्पाच्या हार्डवेअर आणि सॉफ्टवेअर या दोन्ही पैलूंची विद्यार्थ्यांना माहिती मिळाली.विविध सर्किट आउटपुट्स आणि प्रोग्रामिंग पद्धतींचे प्रयोग करून सर्जनशीलता विकसित करण्यासही विद्यार्थ्यांना प्रोत्साहन मिळाले. विद्यार्थ्यांचा सक्रिय सहभाग आणि उत्साह यामुळे कार्यशाळा यशस्वी ठरली. ‘सर्किट क्राफ्ट’च्या माध्यमातून विद्यार्थ्यांना सर्किट तयार करणे, कोडिंग करणे, समस्या निवारण करणे आणि आत्मविश्वासाने एम्बेडेड सिस्टिम्सवर काम करण्याचा अनुभव मिळाला. तांत्रिक शिक्षण, नावीन्यपूर्णता, सांघिक कार्य आणि अभियांत्रिकी क्षेत्रातील प्रत्यक्ष अनुभवाला चालना देण्याची स्पार्क क्लबची कटिबद्धता या उपक्रमातून अधोरेखित झाली.
