लोकतंत्र मिरर
यवतमाळ : राज्यातील शालेय पोषण आहार योजनेसमोर सध्या मोठे आव्हान उभे राहिले आहे. नवीन शैक्षणिक वर्ष सुरू होऊन महिनाभराचा कालावधी उलटला, तरी अनेक शाळांना तांदळाचा पुरवठा झालेला नाही. त्यामुळे आतापर्यंत उपलब्ध साठ्यावर विद्यार्थ्यांसाठी खिचडी तयार करणाऱ्या शाळांपुढे आता अडचणी वाढल्या असून, अनेक ठिकाणी धान्य संपल्याने मध्यान्ह भोजन बंद होण्याची भीती व्यक्त केली जात आहे.
शालेय पोषण आहार हा अनेक विद्यार्थ्यांसाठी दिवसातील महत्त्वाचा आहार मानला जातो. मात्र, यंदा पुरवठा वेळेत न झाल्याने शिक्षक आणि मुख्याध्यापकांना उपलब्ध धान्याचे काटेकोर नियोजन करत विद्यार्थ्यांचा आहार सुरू ठेवावा लागला. आता हा साठाही संपत आल्याने शाळांची चिंता वाढली आहे. मिळालेल्या माहितीनुसार, तांदूळ वाहतुकीसंदर्भातील कंत्राटाची मुदत संपल्यानंतर नवीन करार प्रक्रियेला विलंब झाला आहे. त्याचा थेट परिणाम शाळांपर्यंत धान्य पोहोचण्यावर झाला. परिणामी अनेक शाळांनी शिक्षण विभागाशी पत्रव्यवहार सुरू केला असून, तातडीने तांदूळ उपलब्ध करून देण्याची मागणी केली आहे.
दरम्यान, शालेय पोषण आहार विभागानेही जिल्ह्यातील शाळांकडून उपलब्ध धान्यसाठ्याची माहिती मागविली आहे. ज्या शाळांमध्ये तांदूळ पूर्णपणे संपला आहे, त्या ठिकाणी नवीन करारानंतर प्राधान्याने पुरवठा करण्याची तयारी असल्याचे सांगितले जात आहे. मात्र, याबाबत अंतिम आदेश अद्याप मिळालेला नसल्याने अनिश्चितता कायम आहे. दररोज शाळेत मिळणाऱ्या पोषण आहारावर अनेक विद्यार्थ्यांचे पोषण अवलंबून असते. त्यामुळे तांदळाचा पुरवठा तातडीने सुरळीत करणे आवश्यक असल्याची भावना पालक, शिक्षक आणि शिक्षण क्षेत्रातून व्यक्त होत आहे.
