लोकतंत्र मिरर
नांदेड, रविंद्र औंढेकर (जिल्हा प्रतिनिधी) : पदवीधर मतदारसंघाचे महायुतीचे उमेदवार श्री. सतीश चव्हाण यांच्या प्रचारार्थ शनिवार, दिनांक १० ऑक्टोबर रोजी लोहा, कंधार, मुखेड आणि नायगाव येथे बैठकांचे आयोजन करण्यात आले आहे. या बैठकांना आमदार प्रतापराव पाटील चिखलीकर, आमदार विक्रम काळे, आमदार डॉक्टर तुषार राठोड व आमदार राजेश पवार यांच्यासह महायुतीचे सर्व नेते उपस्थित राहणार आहेत.
पदवीधर मतदारसंघाच्या निवडणुकीच्या पार्श्वभूमीवर आयोजित केलेल्या या बैठकांमध्ये उमेदवार सतीश चव्हाण यांच्या प्रचाराचे नियोजन, निवडणुकीच्या अनुषंगाने करावयाच्या कार्यवाहीसह महायुतीच्या घटक पक्षांमधील समन्वय आणि प्रचाराची दिशा याबाबत चर्चा होणार आहे. या बैठकांच्या वेळा पुढीलप्रमाणे आहेत. शनिवारी सकाळी ११ वाजता लोहा येथील जिजामाता मंगल कार्यालयात पहिली बैठक होईल. त्यानंतर दुपारी १२.३० वाजता कंधार येथील नगरेश्वर मंदिर मंगल कार्यालयात बैठक आयोजित करण्यात आली आहे. दुपारी ३ वाजता मुखेड येथे बैठक होणार असून, सायंकाळी ५ वाजता नायगाव येथील साईतीर्थ मंगल कार्यालयात शेवटची बैठक होणार आहे.
या बैठकांना राष्ट्रवादी काँग्रेससह महायुतीच्या सर्व घटक पक्षांचे लोकप्रतिनिधी, पदाधिकारी, कार्यकर्ते तसेच संबंधित पदाधिकाऱ्यांनी मोठ्या संख्येने उपस्थित राहावे, असे आवाहन करण्यात आले आहे. पदवीधर मतदारसंघाच्या निवडणुकीत महायुतीच्या उमेदवाराच्या प्रचाराला गती देण्यासाठी आणि सर्व घटक पक्षांनी समन्वयाने काम करण्याच्या दृष्टीने या बैठकांना महत्त्व आहे.
