लोकतंत्र मिरर
जम्मू-काश्मीर : जम्मू-काश्मीरमधील राजौरी जिल्ह्यात नियंत्रण रेषेजवळ (LOC) मंगळवारी भूसुरुंगाचा स्फोट होऊन एक ज्युनियर कमिशन्ड ऑफिसर (JCO) आणि तीन जवान जखमी झाले. नौशेरा सेक्टरमधील कलाल परिसरात ही घटना घडली. नियमित गस्तीदरम्यान झालेल्या या स्फोटामुळे काही काळ सीमेवरील परिसरात खळबळ उडाली.
लष्करी सूत्रांनी दिलेल्या माहितीनुसार, जवानांची एक तुकडी सीमेवर नियमित गस्त घालत होती. याच वेळी अचानक भूसुरुंगाचा स्फोट झाला. स्फोट इतका जोरदार होता की त्याचा आवाज दूरपर्यंत ऐकू गेला. घटनेची माहिती मिळताच जवळील चौक्यांवरील जवानांनी तातडीने घटनास्थळी धाव घेत बचावकार्य सुरू केले. स्फोटात जखमी झालेल्या JCOसह चारही जवानांना त्वरित प्राथमिक उपचार देण्यात आले. त्यानंतर त्यांना लष्करी रुग्णालयात दाखल करण्यात आले. डॉक्टरांच्या देखरेखीखाली त्यांच्यावर उपचार सुरू असून काही जवानांची प्रकृती स्थिर असल्याचे सांगण्यात आले आहे.
सीमेपलीकडून होणारी दहशतवादी घुसखोरी रोखण्यासाठी नियंत्रण रेषेजवळील काही भागांमध्ये भूसुरुंग पेरले जातात. मात्र, मुसळधार पाऊस, पूरस्थिती किंवा भूस्खलनामुळे हे भूसुरुंग त्यांच्या मूळ ठिकाणाहून हलू शकतात. त्यामुळे गस्तीदरम्यान जवानांसाठी धोका निर्माण होण्याची शक्यता असते. या घटनेनंतर सुरक्षा दलांनी परिसरात विशेष शोधमोहीम सुरू केली आहे. संशयास्पद ठिकाणांची तपासणी केली जात असून सुरक्षा व्यवस्थाही अधिक कडक करण्यात आली आहे. सीमेवरील परिस्थितीवर लष्कराचे बारकाईने लक्ष असून पुढील दुर्घटना टाळण्यासाठी आवश्यक खबरदारी घेतली जात असल्याची माहिती अधिकाऱ्यांनी दिली.
