लोकतंत्र मिरर
धामणगाव रेल्वे : तालुक्यातील जळका पटाचे येथील सहारे कुटुंबावर आर्थिक संकटामुळे बेघर होण्याची वेळ आली होती. एस.आर.जी. स्मॉल फायनान्स बँकेने कर्जवसुलीसाठी कुटुंबाचे घर सील केल्याने कुटुंबीयांची मोठी गैरसोय झाली. विशेष म्हणजे, घरात गरोदर महिला आणि अर्धांगवायूग्रस्त रुग्ण असतानाही ही कारवाई करण्यात आल्याचा आरोप कुटुंबीयांनी केला आहे. त्यामुळे या प्रकरणाने परिसरात चिंता व्यक्त होत होती.
या परिस्थितीत सहारे कुटुंबाने शिवसेनेकडे मदतीची मागणी केली. मुख्यमंत्री एकनाथ शिंदे यांच्या आदेशानंतरही बँकेकडून कारवाई सुरू असल्याचा दावा कुटुंबीयांनी केल्यानंतर शिवसेनेच्या पदाधिकाऱ्यांनी प्रकरणात हस्तक्षेप केला. शिवसेना जिल्हाप्रमुख आशिषभाऊ धर्माळे, तालुकाप्रमुख निलेश तिवारी, योगेश थाळे, दिलीपभाऊ ठाकरे आणि पंकज राठोड यांच्या नेतृत्वाखाली शिवसैनिकांनी घटनास्थळी धाव घेतली. बँकेच्या कारवाईबाबत संबंधितांशी चर्चा करून घर पुन्हा खुले करण्यासाठी मध्यस्थी करण्यात आली. शिवसैनिकांच्या हस्तक्षेपानंतर अवघ्या काही तासांत सहारे कुटुंबाला घराचा ताबा पुन्हा मिळाल्याचा दावा शिवसेनेकडून करण्यात आला.
आर्थिक अडचणींमुळे कोणत्याही सर्वसामान्य कुटुंबावर बेघर होण्याची वेळ येऊ नये. कर्जवसुली करताना बँकांनी मानवी दृष्टिकोन ठेवणे आवश्यक आहे. सहारे कुटुंबाच्या पाठीशी शिवसेना खंबीरपणे उभी असल्याची भूमिका यावेळी पदाधिकाऱ्यांनी मांडली. या वेळी युवासेना तालुकाप्रमुख शुभम ठाकरे यांच्यासह अनेक शिवसैनिक उपस्थित होते.
