लोकतंत्र मिरर
नांदेड (जिल्हा प्रतिनिधी) : गेल्या पाच दशकांत अनुभवला नाही, अशा भीषण दुष्काळाचे सावट महाराष्ट्रावर आले असतानाच मुख्यमंत्री देवेंद्र फडणवीस यांच्या नेतृत्वाखालील महायुती सरकारने पाणी, पीक आणि चारा नियोजनासोबतच उद्योगांना दिलासा देणाऱ्या उपाययोजना केल्या आहेत. राज्यातील ३०५ तालुके दुष्काळग्रस्त म्हणून जाहीर करण्यात आले असून, शेतकऱ्यांच्या खात्यात दिवाळीपूर्वी पाच हजार रुपयांचे अग्रिम अर्थसहाय्य जमा करण्याचा निर्णय घेण्यात आला आहे. या निर्णयाबद्दल भाजपचे नांदेड महानगराध्यक्ष आमदार अमरनाथ राजूरकर यांनी शेतकऱ्यांच्या वतीने फडणवीस सरकारचे अभिनंदन केले आहे.
या महत्त्वपूर्ण निर्णयामुळे राज्यातील साडेतीन लाख कुटुंबांच्या कर्जमाफीचा मार्ग मोकळा होऊन बळीराजाला मोठा दिलासा मिळाला आहे, अशा शब्दांत आमदार राजूरकर यांनी समाधान व्यक्त केले. दुष्काळाच्या गंभीर परिस्थितीत शेतकऱ्यांकडून कर्जवसुलीसाठी तगादा लावणाऱ्या यंत्रणांनाही मुख्यमंत्र्यांनी सक्त ताकीद दिली आहे. पिण्याचे पाणी आणि पुरेसा चारा उपलब्ध करून देण्यासाठी ठोस उपाययोजना करत दुष्काळाचा सामना करण्याची तयारी फडणवीस सरकारने केली असून, त्यातून एक आदर्श निर्माण केला असल्याचे ते म्हणाले.
शेतकऱ्यांमध्ये आनंदाचे वातावरण
कर्नाटकातील काँग्रेस सरकारकडून केवळ अडीच हजारांची मदत फडणवीस सरकारने पाच हजार रुपयांची अग्रिम मदत जाहीर केली असताना, कर्नाटकातील काँग्रेस सरकारने मात्र दुष्काळात होरपळणाऱ्या शेतकऱ्यांची केवळ अडीच हजार रुपयांच्या मदतीची घोषणा करून बोळवण केली आहे, याकडे आमदार राजूरकर यांनी लक्ष वेधले. महाराष्ट्रातील फडणवीस सरकारने जाहीर केलेली मदत कर्नाटकापेक्षा दुप्पट आहे. महाराष्ट्र सरकारने मदत जाहीर केली असताना कर्नाटक सरकार मात्र अजूनही केंद्राकडून मदत मिळण्याची वाट पाहत आहे. त्यामुळे तेथील दुष्काळग्रस्त शेतकऱ्यांच्या हातात ही तुटपुंजी मदत तरी वेळेवर मिळेल का, याबाबत शंकाच असल्याचे ते म्हणाले.
