लोकतंत्र मिरर
नांदेड, रवींद्र औंढेकर (जिल्हा प्रतिनिधी) : स्वच्छता ही सेवा अभियानांतर्गत महापालिकेने गुरुवारी विशेष सामूहिक श्रमदान उपक्रम राबविला. महापालिका आयुक्त डॉ. महेशकुमार डोईफोडे यांच्या मार्गदर्शनाखाली गोदावरी नदीच्या गोवर्धन घाटावर स्वच्छता मोहीम यशस्वीपणे पार पडली.
सकाळी आठ वाजता सुरू झालेल्या या मोहिमेत महापालिका आयुक्तांसह वरिष्ठ अधिकारी, स्वच्छता निरीक्षक आणि शेकडो स्वच्छता कर्मचाऱ्यांनी प्रत्यक्ष हातात झाडू व टोपले घेऊन श्रमदान केले. नदीच्या घाटावरील प्लास्टिक कचरा, निर्माल्य, ओला-सुका कचरा तसेच घाटावर वाढलेली झाडेझुडपे हटवून संपूर्ण परिसर स्वच्छ करण्यात आला.
शासनाच्या या आवाहनाला नागरिकांनीही उत्स्फूर्त प्रतिसाद दिला. विविध सामाजिक संस्थांचे प्रतिनिधी, पर्यावरणप्रेमी, नागरिक, महिला तसेच स्टेट बँक ऑफ इंडियाचे अधिकारी व कर्मचारी मोठ्या संख्येने या मोहिमेत सहभागी झाले. मोहिमेची सांगता सामूहिक स्वच्छता शपथ घेऊन करण्यात आली.
