लोकतंत्र मिरर
कोल्हापूर, राजन शेळके ( प्रतिनिधी) : करवीरनिवासिनी श्री अंबाबाई मंदिरात बॅरिकेडिंगवरून वाद झाला. पहाटे पाचच्या सुमारास अंबाबाईची उत्सवमूर्ती मंदिरात नेत असताना बॅरिकेड्सजवळ पोलिसांनी अडवल्याने श्रीपूजक आणि पोलिसांमध्ये शाब्दिक बाचाबाची झाली. श्रीपूजकांनी मंदिरातच घोषणाबाजी करत ठिय्या आंदोलन केले. वरिष्ठ पोलिस अधिकाऱ्यांनी योग्य कार्यवाहीचे आश्वासन दिल्यानंतर आंदोलन मागे घेण्यात आले.
सुरक्षेच्या कारणास्तव अंबाबाई मंदिर परिसरात पोलिसांकडून मोठ्या प्रमाणात बॅरिकेडिंग करण्यात आले आहे. मात्र, या व्यवस्थेमुळे भाविकांसह श्रीपूजकांचीही गैरसोय होत असल्याचा आरोप करण्यात आला. सोमवारी पहाटे श्रीपूजकांना देवीची उत्सवमूर्ती मंदिरात नेण्यापासून पोलिसांनी रोखल्याने गोंधळ निर्माण झाला.
परिसरातील छोट्या मंदिरांमध्ये दर्शनासाठी जाणाऱ्या भाविकांनाही बॅरिकेडिंगचा त्रास सहन करावा लागत असल्याचे श्रीपूजकांनी सांगितले. धार्मिक विधी पार पाडताना पोलिस किंवा सुरक्षा यंत्रणेकडून अडथळे निर्माण होत असतील, तर नवरात्रोत्सवातील बॅरिकेडिंगच्या नियोजनावर फेरविचार करावा, अशी मागणी त्यांनी केली.
