लोकतंत्र मिरर
पुणे : संत तुकाराम महाराज आणि संत ज्ञानेश्वर महाराज यांच्या पालखी सोहळ्याचा आज (गुरुवार) आणि उद्या (शुक्रवार) पुण्यात मुक्काम आहे. या पार्श्वभूमीवर भाविकांच्या सुरक्षिततेसाठी पुणे शहरात कडेकोट सुरक्षा व्यवस्था उभारण्यात आली असून तब्बल ७ हजार पोलिस अधिकारी व कर्मचारी बंदोबस्तासाठी तैनात करण्यात आले आहेत.
यंदाच्या पालखी सोहळ्यात प्रथमच कृत्रिम बुद्धिमत्ता (AI) आधारित तंत्रज्ञानाचा वापर करण्यात येणार आहे. पालखी मार्गावर मोठ्या प्रमाणात देखरेख ठेवण्यासाठी शेकडो अत्याधुनिक सीसीटीव्ही कॅमेरे, चेहरा ओळखणारी (फेशियल रिकग्निशन) यंत्रणा आणि प्रगत विश्लेषण प्रणाली कार्यरत राहणार आहे.
भाविकांच्या सोयीसाठी पालखीचे थेट स्थान (Live Location) पाहण्याची सुविधाही उपलब्ध करून देण्यात आली आहे. त्यामुळे पालखीचा प्रवास आणि सद्यस्थितीची माहिती नागरिकांना सहज मिळणार आहे. याशिवाय, शहरात पाच ठिकाणी पोलिस मदत केंद्रे उभारण्यात आली असून पालखी मार्गावरील गर्दी लक्षात घेऊन काही प्रमुख मार्गांवरील वाहतूक व्यवस्थेत तात्पुरते बदल करण्यात आले आहेत. त्यामुळे नागरिकांनी प्रशासनाच्या सूचनांचे पालन करून पर्यायी मार्गांचा वापर करावा, असे आवाहन करण्यात आले आहे.
या संपूर्ण बंदोबस्तासाठी वरिष्ठ पोलिस अधिकाऱ्यांसह राज्य राखीव पोलिस दल (SRPF), गृहरक्षक दल, तातडीची प्रतिसाद पथके (QRT) तसेच स्फोटक शोध पथके तैनात करण्यात आली आहेत. पारंपरिक भक्तीचा सोहळा सुरक्षित आणि सुरळीत पार पडावा, यासाठी प्रशासनाने अत्याधुनिक तंत्रज्ञानासह सर्व यंत्रणा सज्ज ठेवल्या आहेत.
