लोकतंत्र मिरर
पुणे : पुणे जिल्ह्यासाठी आज ऑरेंज अलर्ट जारी करण्यात आला असून पुढील तीन तास नागरिकांसाठी महत्त्वाचे ठरणार आहेत. सचेत अॅपवर उपलब्ध माहितीनुसार, पुणे जिल्ह्यासह मुंबई उपनगर, नाशिक, पुणे घाट परिसर आणि रायगड जिल्ह्यातील काही भागांत हवामानात अचानक बदल होण्याची शक्यता व्यक्त करण्यात आली आहे.
या कालावधीत संबंधित भागांमध्ये ताशी ४० ते ५० किलोमीटर वेगाने सोसाट्याचे वारे वाहण्याचा अंदाज आहे. त्याचबरोबर मध्यम ते जोरदार स्वरूपाचा पाऊसही पडू शकतो, असा इशारा देण्यात आला आहे. त्यामुळे नागरिकांनी हवामानाची परिस्थिती लक्षात घेऊन आवश्यक ती खबरदारी घेण्याचे आवाहन करण्यात आले आहे. प्रशासनाने नागरिकांना अनावश्यक प्रवास टाळण्याचा सल्ला दिला आहे. विशेषतः जोरदार वारे आणि पावसाच्या पार्श्वभूमीवर सुरक्षित ठिकाणी राहणे, तसेच हवामानाशी संबंधित अधिकृत सूचनांवर लक्ष ठेवणे आवश्यक असल्याचे सांगण्यात आले आहे.
सचेत अॅपवरील ताज्या माहितीनुसार, पुढील काही तासांत हवामानाचा प्रभाव वाढण्याची शक्यता असल्याने नागरिकांनी सतर्क राहावे आणि कोणत्याही आपत्कालीन परिस्थितीत स्थानिक प्रशासनाच्या सूचनांचे पालन करावे, असे आवाहन करण्यात आले आहे.
