लोकतंत्र मिरर
आग्रा : आग्रा शहरातून एक अत्यंत धक्कादायक आणि अंगावर काटा आणणारी घटना समोर आली आहे. पतीची हत्या करून त्याचा मृतदेह घरातीलच बाथरूममध्ये गाडल्याचा प्रकार तब्बल ४५ दिवसांनंतर उघड झाला आहे. या प्रकरणामुळे संपूर्ण परिसरात खळबळ उडाली आहे.मिळालेल्या माहितीनुसार, रूबी शर्मा या महिलेने आधीच संपूर्ण कट रचल्याचे तपासात समोर आले आहे. तिने बाथरूममध्ये दुरुस्तीचे काम सुरू केले, खड्डा तयार करून ठेवला आणि त्यानंतर पती सुरेंद्र शर्मा यांची हत्या केली. हत्या केल्यानंतर मृतदेह त्याच खड्ड्यात गाडून वरून सिमेंट टाकण्यात आले आणि फरशी बसवण्यात आली, जेणेकरून कुणालाही संशय येऊ नये.
घटनेनंतर रूबी सतत एकच सांगत होती की तिचे पती बाहेर गेले आहेत आणि लवकरच परत येतील. जवळपास दीड महिना हीच गोष्ट ती कुटुंबीयांना आणि शेजाऱ्यांना सांगत राहिली. दरम्यान, सुरेंद्र बराच काळ दिसत नसल्याने कुटुंबाला संशय येऊ लागला.पोलिस तपासात सुरुवातीला कोणताही ठोस धागा लागत नव्हता. मात्र संशय वाढल्यानंतर पोलिसांनी घराची सखोल झडती घेतली. त्यावेळी नुकतीच केलेली बाथरूमची फरशी संशयास्पद वाटली. फरशी काढल्यानंतर खाली माती आणि नंतर मृतदेह आढळून आला.
या घटनेमुळे परिसरात भीती आणि धक्का निर्माण झाला आहे. पोलिसांनी आरोपी पत्नीला ताब्यात घेतले असून तिची कसून चौकशी सुरू आहे. हत्येमागचे नेमके कारण काय होते, तसेच या कटात अजून कोणाचा सहभाग आहे का याचा तपास सुरू आहे.ही घटना केवळ एका गुन्ह्यापुरती मर्यादित नसून नात्यांमधील विश्वासाला हादरा देणारी ठरली आहे.
