लोकतंत्र मिरर
लोणावळा : पावसाळ्याची खरी मजा अनुभवण्यासाठी वीकेंडला हजारो पर्यटकांनी लोणावळ्याकडे धाव घेतली. गेल्या काही दिवसांपासून सुरू असलेल्या मुसळधार पावसामुळे संपूर्ण परिसर हिरवागार झाला असून, डोंगररांगांमधून कोसळणारे धबधबे आणि धुक्याने वेढलेले निसर्गरम्य वातावरण पर्यटकांना भुरळ घालत आहे.
सतत पडणाऱ्या पावसामुळे परिसरातील ओढे, नाले आणि लहान जलप्रवाह दुथडी भरून वाहत आहेत. यामुळे भुशी धरण, लायन्स पॉइंट, टायगर पॉइंट, कार्ला लेणी, भाजे लेणी आणि मळवली परिसरात दिवसभर पर्यटकांची मोठी गर्दी पाहायला मिळाली. अनेकांनी धबधब्यांजवळ भिजत पावसाळी सहलीचा मनमुराद आनंद लुटला. वीकेंडमुळे पर्यटकांची संख्या मोठ्या प्रमाणात वाढल्याने शहरातील प्रमुख रस्ते, भुशी धरणाकडे जाणारा मार्ग तसेच मुंबई-पुणे महामार्गालगतच्या काही ठिकाणी वाहतूक संथ झाली. परिस्थिती नियंत्रणात ठेवण्यासाठी पोलिसांनी अतिरिक्त बंदोबस्त तैनात केला असून, वाहतूक सुरळीत राहावी यासाठी विशेष नियोजन करण्यात आले आहे.
दरम्यान, मुसळधार पावसामुळे काही ठिकाणी पाण्याचा प्रवाह वेगाने वाहत असल्याने प्रशासनाने पर्यटकांना सतर्कतेचा इशारा दिला आहे. ओसंडून वाहणाऱ्या ओढे-नाल्यांमध्ये उतरू नये, धबधब्यांच्या परिसरात आवश्यक ती खबरदारी घ्यावी आणि सेल्फीच्या नादात जीव धोक्यात घालू नये, असे आवाहन करण्यात आले आहे. तसेच सर्वांनी सुरक्षा नियमांचे पालन करून प्रशासनाच्या सूचनांचे काटेकोरपणे पालन करावे, असेही प्रशासनाने स्पष्ट केले आहे.
