लोकतंत्र मिरर
केंद्रीय सरकारी कर्मचारी आणि पेन्शनधारकांसाठी दिलासादायक बातमी समोर येत आहे. आठवा वेतन आयोग लागू होण्यासाठी अजून काही काळ प्रतीक्षा करावी लागणार असली, तरी त्याआधीच महागाई भत्त्यात (DA) वाढ होण्याची शक्यता व्यक्त केली जात आहे. जुलै २०२६ पासून कर्मचाऱ्यांच्या महागाई भत्त्यात २ ते ३ टक्क्यांची वाढ होऊ शकते, असा अंदाज तज्ज्ञांकडून वर्तवला जात आहे.
सध्या केंद्रीय कर्मचाऱ्यांना सातव्या वेतन आयोगानुसार वेतन आणि भत्ते मिळत आहेत. मात्र वाढती महागाई आणि दैनंदिन खर्च लक्षात घेता, कर्मचाऱ्यांना अतिरिक्त आर्थिक दिलासा देण्याची मागणीही विविध कर्मचारी संघटनांकडून केली जात आहे. केंद्र सरकार वर्षातून दोनदा, जानेवारी आणि जुलै महिन्यात महागाई भत्त्याचा आढावा घेते. यासाठी ग्राहक किंमत निर्देशांक (CPI-IW) आणि महागाईशी संबंधित इतर आर्थिक आकडेवारीचा आधार घेतला जातो. अलीकडील आकडेवारीनुसार अन्नधान्य आणि जीवनावश्यक वस्तूंच्या किमती वाढल्याने महागाई भत्त्यात वाढ होण्याची शक्यता अधिक बळावली आहे.
सध्या केंद्रीय कर्मचाऱ्यांना मूळ वेतनाच्या ५८ टक्के महागाई भत्ता मिळत आहे. जर सरकारने २ ते ३ टक्क्यांच्या वाढीला मंजुरी दिली, तर लाखो कर्मचारी आणि पेन्शनधारकांच्या मासिक उत्पन्नात वाढ होईल. त्यामुळे आता सर्वांचे लक्ष केंद्र सरकारच्या पुढील निर्णयाकडे लागले आहे. मात्र, महागाई भत्त्यातील संभाव्य वाढ आणि आठव्या वेतन आयोगाबाबत केंद्र सरकारकडून अद्याप कोणतीही अधिकृत घोषणा करण्यात आलेली नाही. त्यामुळे अंतिम निर्णय येईपर्यंत कर्मचाऱ्यांना प्रतीक्षा करावी लागणार आहे.
