लोकतंत्र मिरर
पुणे,राजन शेळके (प्रतिनिधी) : रायरेश्वर डोंगरी विकास परिषदेच्या अध्यापक महाविद्यालयात सावित्रीबाई फुले पुणे विद्यापीठांतर्गत शिक्षणशास्त्र महाविद्यालयातील विद्यार्थ्यांसाठी भारतीय ज्ञानपरंपरेवर आधारित ‘राजगड करंडक’ पाठसादरीकरण स्पर्धेचे आयोजन करण्यात आले होते. या स्पर्धेत १५ महाविद्यालयांनी सहभाग घेतला.
संस्थेचे अध्यक्ष संग्रामदादा थोपटे व सचिव स्वरूपाताई थोपटे यांच्या मार्गदर्शनाखाली आयोजित या स्पर्धेचे उद्घाटन प्रमुख पाहुणे एस.एन.डी.टी. होम सायन्स महाविद्यालयाचे प्राचार्य डॉ. गणेश चव्हाण यांच्या हस्ते झाले. कार्यक्रमाचे प्रास्ताविक महाविद्यालयाचे प्राचार्य डॉ. दत्तात्रय थोरात यांनी केले. स्पर्धेच्या आयोजनामागील भूमिका त्यांनी स्पष्ट केली.
यावेळी डॉ. गणेश चव्हाण यांनी ब्रिटिशकालीन शिक्षणव्यवस्था कारकून निर्माण करणारी असल्याचे सांगत भारतीय प्राचीन ज्ञानपरंपरेचे महत्त्व विशद केले. भारताच्या शाश्वत विकासासाठी भारतीय ज्ञानपरंपरेचा उपयोग शिक्षकांनी दैनंदिन अध्यापनात करणे आवश्यक असल्याचे त्यांनी नमूद केले. डॉ. प्रदीप थोपटे यांनीही भारतीय ज्ञानपरंपरेचे महत्त्व सांगितले.
स्पर्धेसाठी बहिस्थ परीक्षक म्हणून डॉ. अतुल गायकवाड व डॉ. मनोज बोराटे यांनी, तर अंतर्गत परीक्षक म्हणून डॉ. स्मिता भामरे व सहायक प्राध्यापक लीना पाटील यांनी काम पाहिले. कार्यक्रमाचे सूत्रसंचालन अक्षता मलारा यांनी केले. समन्वयक म्हणून डॉ. किरण अबनावे, सहायक प्राध्यापक सिमी कौल व डॉ. सचिन मकवान यांनी जबाबदारी पार पाडली. डॉ. अश्विनी भांडवले व सहायक प्राध्यापक विनया बनसोडे यांनी तांत्रिक बाजू सांभाळली. प्राध्यापकेतर कर्मचाऱ्यांनीही कार्यक्रमासाठी सहकार्य केले.
स्पर्धेत रायरेश्वर डोंगरी विकास परिषदेच्या अध्यापक महाविद्यालयाचा डीऑन जोसेफ याने प्रथम क्रमांक पटकावला. अभिनव शिक्षणशास्त्र महाविद्यालयाच्या मैत्रेयी पाठक हिने द्वितीय, तर संत ज्ञानेश्वर शिक्षणशास्त्र महाविद्यालय, आळंदी येथील रोहिणी इचके हिने तृतीय क्रमांक मिळविला. विजेत्यांना अरणेश्वर अध्यापक महाविद्यालयाचे प्राचार्य डॉ. चौगुले व डॉ. प्रदीप थोपटे यांच्या हस्ते रोख पारितोषिक, चषक व प्रमाणपत्र देऊन गौरविण्यात आले.
