लोकतंत्र मिरर
अमरावती, राज माहोरे (प्रतिनिधी) : अमरावती विभाग शिक्षक मतदारसंघाच्या निवडणुकीत प्रचाराची रणधुमाळी शिगेला पोहोचली असून, प्रबळ दावेदारांकडून पहिल्या पसंतीच्या मतांसोबतच दुसऱ्या पसंतीची मते मिळविण्यासाठी जोरदार जुळवाजुळव सुरू असल्याचे चित्र आहे. शिक्षक मतदारांची पसंती नेमकी कोणाला आहे आणि दुसऱ्या पसंतीची मते कोणाच्या पारड्यात पडणार, याविषयी राजकीय वर्तुळात तर्कवितर्कांना उधाण आले आहे.
दिलीप कडू, महायुतीचे किरण सरनाईक, काँग्रेसच्या ॲड. आदिती पोहरे, शेखर भोयर, डॉ. संगीता शिंदे, प्रा. दत्ता लहाने आणि देवकर यांच्यासह प्रमुख उमेदवार आपापल्या विजयाचे गणित जुळविण्यात व्यस्त आहेत. प्रत्येक उमेदवाराकडून विजयाचा दावा केला जात असला, तरी प्रत्यक्षात शिक्षक मतदारांचा कल कोणाकडे आहे, याचा नेमका अंदाज बांधणे कठीण झाले आहे. त्यामुळे पहिल्या पसंतीच्या मतांबरोबरच दुसऱ्या पसंतीच्या मतांनाही अनन्यसाधारण महत्त्व प्राप्त झाले आहे.
धनशक्ती विरुद्ध जनशक्ती!
शिक्षक मतदारसंघाच्या या निवडणुकीत यंदा धनशक्ती विरुद्ध जनशक्ती असा संघर्ष पाहायला मिळत आहे. एका बाजूला आर्थिक ताकद आणि राजकीय पाठबळाच्या जोरावर विजयाचे गणित मांडले जात असल्याची चर्चा आहे, तर दुसऱ्या बाजूला शिक्षकांचे प्रश्न, उमेदवारांची कार्यशैली, संघटनात्मक ताकद आणि मतदारांशी असलेला थेट संपर्क यावर विजयाची मदार आहे.
आर्थिक ताकदीच्या जोरावर मतांचे गणित जुळविण्याचे प्रयत्न सुरू असल्याची चर्चा असली, तरी शिक्षक मतदारांचा अंतिम कौल कोणाच्या बाजूने जाणार, हे निवडणुकीच्या निकालातूनच स्पष्ट होईल. या निवडणुकीत केवळ प्रचाराचा गाजावाजा किंवा राजकीय पाठबळ निर्णायक ठरणार नसून, शिक्षकांचा विश्वास आणि पहिल्या व दुसऱ्या पसंतीच्या मतांचे गणितही महत्त्वाचे ठरणार आहे. त्यामुळे धनशक्तीच्या जोरावर विजय मिळविण्याचे प्रयत्न यशस्वी होतात की जनशक्तीचा कौल बाजी मारतो, याकडे संपूर्ण अमरावती विभागाचे लक्ष लागले आहे.
संस्था, पतसंस्था प्रचाराच्या कामाला?
प्रमुख उमेदवारांचे संस्थात्मक आणि संघटनात्मक संबंध लक्षात घेता विविध संस्था, पतसंस्था आणि शिक्षक संघटनांच्या भूमिकेकडे लक्ष लागले आहे. उमेदवारांचे समर्थक आपापल्या परीने मतदारांशी संपर्क वाढवत असून, मतांचे संभाव्य समीकरण जुळविण्याचे प्रयत्न सुरू असल्याचे चित्र आहे. मात्र, संस्थात्मक पाठबळ म्हणजे मतांची हमखास बेरीज नव्हे. संघटनांमधील अंतर्गत मतभेद, स्थानिक नेतृत्वाची भूमिका आणि उमेदवारांबद्दल शिक्षकांमध्ये असलेली नाराजी किंवा विश्वास यांचाही निकालावर परिणाम होऊ शकतो. त्यामुळे कोणत्या उमेदवाराला संस्थात्मक पाठबळाचा प्रत्यक्ष फायदा मिळतो, हे पाहणे महत्त्वाचे ठरणार आहे.
संगीता शिंदे, शेखर भोयर यांच्या भूमिकेकडे लक्ष
डॉ. संगीता शिंदे यांच्या उमेदवारीची ताकद, शेखर भोयर यांचे शिक्षक संघटनांमधील स्थान, प्रा. दत्ता लहाने यांची प्रचारातील सक्रियता आणि किरण सरनाईक यांच्यामागे असलेली महायुतीची राजकीय ताकद यांची निवडणूक वर्तुळात चर्चा आहे. आदिती पोहरे यांच्यासाठी काँग्रेसकडून सुरू असलेले प्रयत्न, तर दिलीप कडू आणि देवकर यांची स्वतंत्र मतांची जुळवाजुळव यांमुळे निवडणुकीतील चुरस वाढली आहे. उमेदवारांच्या समर्थकांकडून दुसऱ्या पसंतीच्या मतांसाठी संपर्क साधला जात असल्याची चर्चा असली, तरी प्रत्यक्षात कोण कोणाला मते देणार, याचे निश्चित चित्र अद्याप स्पष्ट झालेले नाही. त्यामुळे मतांच्या हस्तांतरणाबाबतचे दावे आणि प्रत्यक्ष मतदानातील कल यांची सांगड निकालाच्या वेळीच घालता येणार आहे.
अमरावती, बुलडाणा निर्णायक?
अमरावती आणि बुलडाणा या दोन जिल्ह्यांतील मतांचे गणित निवडणुकीत महत्त्वाची भूमिका बजावू शकते. या जिल्ह्यांतील शिक्षक मतदारांचा कल, संघटनात्मक संपर्क आणि उमेदवारांना मिळणारा प्रतिसाद यावर अनेक दावेदारांचे भवितव्य अवलंबून राहणार आहे. जिल्हानिहाय अस्मिता, स्थानिक नेतृत्वाचा प्रभाव आणि शिक्षकांच्या प्रलंबित प्रश्नांनाही मतदानात महत्त्व मिळण्याची शक्यता आहे.
पहिल्या पसंतीच्या मतांमध्ये आघाडी मिळविण्याबरोबरच दुसऱ्या पसंतीच्या मतांमधून संभाव्य फायदा मिळविण्यासाठी उमेदवारांनी रणनीती आखण्यास सुरुवात केली आहे. त्यामुळे निवडणुकीच्या अंतिम टप्प्यात पडद्यामागील हालचालींना वेग आला आहे. पहिल्या पसंतीत कोण आघाडी घेणार आणि दुसऱ्या पसंतीच्या मतांचे गणित कोणाच्या विजयाचा मार्ग मोकळा करणार? धनशक्ती प्रभावी ठरणार की जनशक्ती बाजी मारणार? याचे उत्तर निकालातूनच मिळणार आहे.
