लोकतंत्र मिरर
अमरावती, राज माहोरे (प्रतिनिधी) : अमरावती विभाग शिक्षक मतदारसंघाच्या निवडणुकीतील अंतिम लढतीचे चित्र स्पष्ट झाले असून, उमेदवारी अर्ज मागे घेण्याच्या प्रक्रियेनंतर राजकीय समीकरणांना नवे वळण मिळाले आहे. महायुतीतील तीन बंडखोर उमेदवारांनी माघार घेतली असली, तरी भाजप आणि शिवसेना शिंदे गटाशी संबंधित तीन उमेदवार निवडणुकीच्या रिंगणात कायम असल्याने महायुतीसमोरील बंडखोरीचे आव्हान पूर्णपणे संपलेले नाही. बंडखोरांची मनधरणी करण्यात पक्षश्रेष्ठींना कितपत यश आले, याची प्रचिती आता प्रत्यक्ष निवडणुकीत येणार आहे.
पोहरादेवी येथील महंत सुनील महाराज चव्हाण, युवा स्वाभिमान पक्षाच्या प्रीती रेवने आणि प्रहार सामाजिक संघटनेचे नितीन आगे यांनी आपले उमेदवारी अर्ज मागे घेतले आहेत. त्यामुळे या उमेदवारांच्या माघारीने निवडणुकीतील काही राजकीय समीकरणे बदलण्याची शक्यता निर्माण झाली आहे.
महायुतीतून शिंदे सेनेला उमेदवारी; तरीही बंडखोरीचे आव्हान
अमरावती विभाग शिक्षक मतदारसंघाची जागा महायुतीत शिवसेना शिंदे गटाच्या वाट्याला आली असून, विद्यमान आमदार किरण सरनाईक यांना उमेदवारी देण्यात आली आहे. मात्र, महायुतीतील काही नेत्यांनी आणि पदाधिकाऱ्यांशी संबंधित उमेदवारांनी निवडणुकीतून माघार न घेतल्याने अधिकृत उमेदवारासमोर आव्हान कायम आहे.
महायुतीशी संबंधित निवडणूक रिंगणातील तीन प्रमुख चेहरे :
१. संगीता सचिंद्र शिंदे-बोंडे — भाजपचे खासदार अनिल बोंडे यांच्या भगिनी.
२. शेखर भोयर — भाजपशी संबंधित असून, आमदार राजेश वानखडे यांचे मेहुणे.
३. श्रीकांत देशपांडे — माजी आमदार तथा शिवसेना शिंदे गटाचे पदाधिकारी.
या तिन्ही उमेदवारांनी माघार न घेतल्याने महायुतीतील मतांचे विभाजन होण्याची शक्यता राजकीय वर्तुळात चर्चेचा विषय ठरत आहे. अधिकृत उमेदवाराला या बंडखोरीचा किती फटका बसतो, यावर निवडणुकीतील पुढील राजकीय गणिते अवलंबून राहतील.
महाविकास आघाडीकडून काँग्रेस आणि ठाकरे गटाचे उमेदवार
महाविकास आघाडीकडून काँग्रेसच्या अदिती ऋषिकेश पोहरे आणि शिवसेना उद्धव बाळासाहेब ठाकरे गटाचे दत्तात्रय लहाने हे निवडणूक रिंगणात आहेत. त्यामुळे शिक्षक मतदारसंघातील लढत अधिक चुरशीची होण्याची चिन्हे आहेत. एका बाजूला महायुतीतील अंतर्गत संघर्ष आणि दुसऱ्या बाजूला महाविकास आघाडीचे उमेदवार, अशा पार्श्वभूमीवर शिक्षक मतदारांचा कौल कोणाच्या बाजूने झुकतो, याकडे राजकीय पक्षांचे लक्ष लागले आहे.
२७ उमेदवार मैदानात
उमेदवारी अर्ज माघारीनंतर अमरावती विभाग शिक्षक मतदारसंघाच्या निवडणुकीत एकूण २७ उमेदवार मैदानात कायम असल्याचे स्पष्ट झाले आहे. त्यामुळे अधिकृत उमेदवारांसह अपक्ष आणि अन्य उमेदवारांची उपस्थितीही निवडणुकीतील मतविभाजनाच्या दृष्टीने महत्त्वाची ठरणार आहे. महायुतीतील तीन उमेदवारांची माघार झाली असली, तरी प्रमुख बंडखोरांनी घेतलेली भूमिका पक्षश्रेष्ठींसाठी चिंतेचा विषय ठरू शकते. आता प्रचाराच्या रणधुमाळीत कोण बाजी मारणार आणि शिक्षक मतदारांचा अंतिम कौल कोणाला मिळणार, याची उत्सुकता वाढली आहे.
