लोकतंत्र मिरर
अहिल्यानगर, राधेशाम कुलकर्णी (जिल्हा प्रमुख) : शहरातील कोठला परिसरात गोवंशाची बेकायदेशीर कत्तल व साठवणुकीच्या आरोपांप्रकरणी पोलिसांनी कठोर कारवाई करत माजी नगरसेवक मुजाहिद (भा.) कुरेशी यांच्यासह संबंधित आरोपींवर भारतीय न्याय संहिता (BNS) कलम १११ अंतर्गत संघटित गुन्हेगारीची तरतूद लागू केल्याबद्दल समस्त गौरक्षकांच्या वतीने पोलीस प्रशासनाचे जाहीर आभार मानण्यात आले आहेत.
या प्रकरणाची गंभीर दखल घेत मानद पशुकल्याण प्रतिनिधी, भारत सरकार मयूर सिंह राजपुरोहित यांनी पोलीस प्रशासनाकडे निवेदनाद्वारे कारवाईची मागणी केली होती. या निवेदनाची तातडीने दखल घेत पोलिसांनी संबंधित प्रकरणात कठोर कायदेशीर पाऊल उचलल्याचे गौरक्षकांनी म्हटले आहे. कोठला परिसरातील कथित गोवंश कत्तल व साठवणुकीच्या प्रकरणात यापूर्वीही कारवाई झाल्याचा दावा करण्यात आला असून, अशा प्रकारांना आळा घालण्यासाठी कठोर कायदेशीर कारवाई आवश्यक असल्याचे गौरक्षकांनी म्हटले आहे.
BNS कलम १११ अंतर्गत कारवाईमुळे कायद्याचा धाक निर्माण होऊन अशा प्रकारच्या गुन्ह्यांना प्रतिबंध होण्यास मदत होईल, अशी अपेक्षा गौरक्षकांनी व्यक्त केली. तसेच गोवंश संरक्षणाच्या दृष्टीने पोलिसांनी घेतलेल्या भूमिकेचे स्वागत करण्यात आले.या कारवाईबद्दल समस्त अहिल्यानगर नागरिक आणि गोभक्तांच्या वतीने पोलीस प्रशासनाचे मनःपूर्वक आभार व्यक्त करण्यात आले आहेत. पुढील तपास निष्पक्षपणे करून दोषींवर कायद्यानुसार कठोर कारवाई करावी, अशी मागणीही मानद पशु कल्याण प्रतिनिधी मयुरसिंग राजपुरोहीत यांनी केली आहे.
