लोकतंत्र मिरर
तिवसा, राज माहोरे (प्रतिनिधी ) : तिवसा शहरातील आई भवानी चौक येथे तान्हा पोळ्याचा उत्सव उत्साहपूर्ण आणि आनंददायी वातावरणात साजरा करण्यात आला. चिमुकल्या बालगोपाळांनी मोठ्या उत्साहाने सहभाग घेत आकर्षक पद्धतीने सजविलेल्या बैलजोड्या आणल्या. रंगीबेरंगी सजावट, पारंपरिक साजशृंगार आणि चिमुकल्यांचा उत्साह यामुळे आई भवानी चौक परिसराला जणू छोटेखानी ग्रामीण उत्सवाचे स्वरूप प्राप्त झाले होते.
तान्हा पोळा हा केवळ लहान मुलांचा उत्सव नसून महाराष्ट्राच्या कृषिप्रधान संस्कृतीशी आणि शेतकरी जीवनाशी जोडलेली महत्त्वाची परंपरा आहे. शेतीच्या कामात शेतकऱ्याला साथ देणाऱ्या बैलांप्रती कृतज्ञता व्यक्त करण्याची भावना या सणामागे आहे. हीच परंपरा आणि संस्कार पुढील पिढीपर्यंत पोहोचावेत, या उद्देशाने चिमुकल्यांनी उत्साहाने तान्हा पोळ्यात सहभाग घेतला. चिमुकल्यांनी आपल्या आवडीनुसार बैलजोड्या सजविल्या होत्या. विविध रंगांचे कागदी गोंडे, फुलांच्या माळा, घंटा, आकर्षक झुली तसेच पारंपरिक साजशृंगारामुळे बैलजोड्या उठून दिसत होत्या. आपल्या सजविलेल्या बैलजोड्या घेऊन आलेल्या बालकांमध्ये विशेष उत्साह पाहायला मिळाला. अनेक पालकांनीही आपल्या मुलांना या पारंपरिक उत्सवात सहभागी करून घेत संस्कृती आणि परंपरेची ओळख करून दिली.
आधुनिकतेच्या युगात संस्कृतीचा जागर
मोबाईल आणि आधुनिक तंत्रज्ञानाच्या युगात पारंपरिक सण-उत्सवांचे महत्त्व कमी होऊ नये, तसेच नव्या पिढीला आपल्या मातीशी आणि संस्कृतीशी जोडता यावे, यासाठी अशा उपक्रमांचे महत्त्व अधिक आहे. तान्हा पोळ्याच्या निमित्ताने बालकांमध्ये प्राणीमात्रांविषयी प्रेम, कृतज्ञता आणि आपल्या ग्रामीण संस्कृतीबद्दल अभिमान निर्माण होण्यास मदत होते. त्यामुळे आई भवानी चौकातील या आयोजनातून परंपरा आणि संस्कारांचा सुंदर संगम पाहायला मिळाला.
आयोजनासाठी युवकांचे विशेष परिश्रम
कार्यक्रमाच्या यशस्वी आयोजनासाठी अंकुश देशमुख, ऋषिकेश गौरखेडे, ऋतिक देशमुख, भाग्येश गौरखेडे, अक्षय तयावडे, अक्षय गौरखेडे, प्रथमेश गौरखेडे, यश गौरखेडे, सुरज गौरखेडे, दिनेश लोहकरे, महेश कोकाटे आणि समर्थ जिकाटे यांनी विशेष परिश्रम घेतले. नियोजनबद्ध आयोजन, बालकांचा सहभाग आणि नागरिकांच्या उत्स्फूर्त प्रतिसादामुळे तान्हा पोळ्याला विशेष रंगत आली.
यावेळी शिवजीत देशमुख, अर्णव गौरखेडे, अधिराज बोन्द्रे, गौरी बोन्द्रे, स्नेहा बोन्द्रे, आस्था देशमुख, सर्वज्ञ गोरे, सान्वी गौरखेडे, समर्थ देशमुख, आरुषी गंधे, रिद्धी बेलसरे, अनघा देशमुख, शिवज्ञा गौरखेडे, ज्ञानाई गौरखेडे, आराध्या गंधे, कादंबरी गंधे, निकुंज गंधे, हॅबी गंधे, उत्कर्ष गंधे, प्रियांश गंधे, लावू देशमुख, अनुष्का वानखडे, सानिका केणे, अंशू वानखडे, श्री सातपुते, शर्वरी वानखडे, ईश्वरी वानखडे, कृष्णा वानखडे, समर्थ जिकाटे, रोहन मीराशे, देवांशू वाठ, अधिराज गंधे, गुणव मुंदाणे यांच्यासह समस्त मित्रपरिवार व नागरिक उपस्थित होते.
चिमुकल्यांच्या चेहऱ्यावरील आनंद, सजविलेल्या बैलजोड्या आणि पारंपरिक वातावरणामुळे आई भवानी चौकातील तान्हा पोळा उपस्थितांसाठी अविस्मरणीय ठरला. या माध्यमातून तिवस्यातील पारंपरिक संस्कृती आणि सण-उत्सव जपण्याची सकारात्मक भावना पुन्हा एकदा अधोरेखित झाली.
