लोकतंत्र मिरर
नागपूर, सतीश तोडासे ( प्रतिनिधी ) : ‘चला शाळेत जाऊया’ अभियानाच्या निमित्ताने महाराष्ट्राचे माननीय शिक्षणमंत्री श्री. दादाजी भुसे यांनी सकाळी ७.३० वाजता सरस्वती विद्यालय, शंकर नगर, नागपूर येथे आकस्मिक भेट देऊन शाळेची पाहणी केली.
या भेटीदरम्यान माननीय शिक्षणमंत्र्यांसोबत शिक्षण विभागाचे उच्चस्तरीय शिष्टमंडळ उपस्थित होते. यामध्ये नागपूर विभागीय मंडळाचे विभागीय अध्यक्ष डॉ. शिवलिंग पटवे, DIET प्राचार्य डॉ. हर्षलता, माध्यमिक विभागाचे शिक्षणाधिकारी, जिल्हा परिषद, नागपूर श्री. अनिल दहिफळे आणि शिक्षणाधिकारी (प्राथमिक), जिल्हा परिषद, नागपूर श्री. निलेश गुंड यांचा समावेश होता. भेटीदरम्यान दादाजी भुसे यांनी शाळेच्या सकाळच्या प्रार्थना सभेत उत्स्फूर्तपणे सहभाग घेतला. त्यांनी विद्यार्थ्यांसोबत सकाळची प्रार्थना तसेच राष्ट्रगीत गायले. यामुळे विद्यार्थ्यांमध्ये उत्साहाचे वातावरण निर्माण झाले.
प्रार्थना सभेनंतर शिक्षणमंत्र्यांनी विद्यार्थ्यांशी थेट संवाद साधत त्यांच्या शैक्षणिक अनुभवांविषयी, अध्ययन प्रक्रियेविषयी आणि शाळेतील विविध उपक्रमांविषयी जाणून घेतले. विद्यार्थ्यांनीही उत्स्फूर्तपणे संवाद साधत आपल्या अनुभवांची माहिती दिली. यानंतर भुसे यांनी शाळेच्या परिसराची सखोल पाहणी केली. त्यांनी वर्गखोल्या, विज्ञान प्रयोगशाळा तसेच विविध शैक्षणिक विभागांची पाहणी करून शैक्षणिक सुविधा आणि विद्यार्थ्यांसाठी उपलब्ध असलेल्या सोयींचा आढावा घेतला.
भेटीच्या समारोपप्रसंगी शाळेच्या माध्यमिक विभागाच्या मुख्याध्यापिका डॉ. रेशमी उमेश, तसेच प्राथमिक विभागाचे प्रभारी श्री. सोनू परास्कर यांच्यासोबत संक्षिप्त संवाद साधण्यात आला. या वेळी विद्यार्थ्यांचा सर्वांगीण विकास, शैक्षणिक गुणवत्ता, पायाभूत सुविधांचा विकास आणि संस्थेच्या प्रगतीबाबत चर्चा करण्यात आली. माननीय शिक्षणमंत्र्यांची ही आकस्मिक भेट विद्यार्थ्यांसाठी तसेच शिक्षकवृंदासाठी प्रेरणादायी ठरली. त्यांच्या प्रत्यक्ष सहभागामुळे शाळेतील शैक्षणिक वातावरणाला नवी ऊर्जा आणि प्रोत्साहन मिळाले.
