लोकतंत्र मिरर
तिवसा, राज माहोरे ( प्रतिनिधी ) : वर्धा येथील महात्मा गांधी हिंदी विश्वविद्यालयात जातीय द्वेषातून केल्या जाणाऱ्या वर्तणुकीचा जाब विचारण्यासाठी विद्यार्थ्यांनी सुरू केलेल्या अनिश्चितकालीन सत्याग्रहाला आज, १० सप्टेंबर रोजी वंचित बहुजन आघाडीचे युवा नेते सुजात आंबेडकर भेट देऊन आंदोलनात सहभागी होणार आहेत. या आंदोलनात अमरावती जिल्ह्यातील युवा विद्यार्थ्यांनी मोठ्या संख्येने सहभागी व्हावे, असे आवाहन वंचित बहुजन युवा आघाडीचे जिल्हा महासचिव सागर भवते यांनी केले आहे.
वर्धा येथील महात्मा गांधी हिंदी विश्वविद्यालयातील मागासवर्गीय बहुजन विद्यार्थ्यांनी केलेल्या आंदोलनामुळे विश्वविद्यालयाच्या वतीने त्यांच्यावर गुन्हे दाखल करून त्यांना विश्वविद्यालयातून बाहेर काढण्यात आले होते. विश्वविद्यालय परिसरात ‘जय भीम, जय संविधान’ नारा देणे प्रतिबंधित करण्यात आले आहे. यासह इतर मागण्यांसाठी विद्यार्थ्यांनी ६७ दिवसांपासून अनिश्चित काळासाठी सत्याग्रह सुरू केला आहे. विद्यार्थ्यांच्या आंदोलनाला पाठिंबा देऊन आंदोलनात सहभागी होण्यासाठी वंचित बहुजन आघाडीचे युवा नेते सुजात आंबेडकर उपस्थित राहणार आहेत. त्यामुळे अमरावती जिल्ह्यातील समस्त संविधानवादी विद्यार्थ्यांनी वर्धा येथील आंदोलनात सहभागी व्हावे, असे आवाहन वंचित बहुजन युवा आघाडीचे जिल्हा महासचिव सागर भवते यांनी केले आहे.
