लोकतंत्र मिरर
नाशिक (प्रतिनिधी) : नाशिक येथील कापड पेठमधील श्री वेंकटेश बालाजी मंदिरात सुरू असलेल्या ब्रह्मोत्सवांतर्गत रविवार, दि. १८ ऑक्टोबर रोजी सकाळी १०.३० ते दुपारी १२ या वेळेत ‘अष्टोत्तरशत कलशाभिषेकम्’ या विशेष धार्मिक सेवेचे आयोजन करण्यात आले. यावेळी श्री व्यंकटेश्वराच्या उत्सवमूर्तींना १०८ कलशांद्वारे अभिषेक करण्यात आला. यजमानांच्या हस्ते हा विधी मोठ्या उत्साहात आणि भक्तिमय वातावरणात पार पडला. लोकक्षेम, समाजात सुख-शांती नांदावी आणि संपूर्ण सृष्टीचे कल्याण व्हावे, यासाठी यावेळी प्रार्थना करण्यात आली.
१०८ कलशांच्या अभिषेकाला धार्मिक महत्त्व
भगवान श्री व्यंकटेश्वराच्या प्रमुख धार्मिक सेवांमध्ये अष्टोत्तरशत कलशाभिषेकम् या विधीला विशेष स्थान आहे. ‘अष्टोत्तरशत’ म्हणजे १०८. हिंदू धार्मिक परंपरेत या संख्येला विशेष महत्त्व असून, जप, पूजा आणि विविध धार्मिक अनुष्ठानांमध्ये १०८ या संख्येचा वापर केला जातो. श्रींच्या उत्सवमूर्तींच्या सन्मानार्थ आयोजित या अभिषेकात १०८ कलशांची स्थापना करून विधिपूर्वक पूजा केली जाते.
या कलशांमध्ये पवित्र जलासह धार्मिक विधीनुसार औषधी वनस्पती आणि गंध यांचा समावेश केला जातो. पारंपरिक पूजाविधी आणि मंत्रोच्चारांच्या सान्निध्यात श्रींचा अभिषेक संपन्न होतो. भक्तांसाठी हा विधी श्रद्धा, समर्पण आणि ईश्वरचरणी प्रार्थना व्यक्त करण्याचे महत्त्वपूर्ण माध्यम मानला जातो.
लोकक्षेम आणि विश्वकल्याणाची प्रार्थना
भारतीय धार्मिक परंपरेत अभिषेकाला देवतेप्रती भक्तिभाव व्यक्त करण्याबरोबरच सर्वांच्या कल्याणासाठी प्रार्थना करण्याचे महत्त्व आहे. अष्टोत्तरशत कलशाभिषेकाच्या माध्यमातून समाजात सुख, शांती, समृद्धी आणि मंगलता नांदावी, अशी प्रार्थना केली जाते. वैयक्तिक हितापलीकडे जाऊन समाज आणि संपूर्ण सृष्टीच्या कल्याणाचा विचार या धार्मिक संकल्पनेतून अधोरेखित होतो. व्यापक स्वरूपात होणारी सहस्र कलशाभिषेक सेवा हीदेखील श्री व्यंकटेश्वराच्या उपासनेतील महत्त्वपूर्ण सेवा मानली जाते. अशा पारंपरिक धार्मिक अनुष्ठानांमुळे वैष्णव उपासना परंपरेचे महत्त्व आणि सांस्कृतिक वारसा पुढील पिढ्यांपर्यंत पोहोचण्यास मदत होते.
