लोकतंत्र मिरर
नागपूर, मोहन जाधव ( प्रतिनिधि ) : नागपूर जिल्हा सायकल पोलो असोसिएशनच्या वतीने आगामी राज्यस्तरीय निवड चाचणी तसेच राष्ट्रीय स्पर्धेच्या तयारीच्या अनुषंगाने पालक, खेळाडू, प्रशिक्षक व पदाधिकाऱ्यांची महत्त्वपूर्ण बैठक झाली. या बैठकीत ३० सप्टेंबर २०२६ रोजी होणाऱ्या राज्यस्तरीय निवड चाचणीचे नियोजन, खेळाडूंची तयारी तसेच पालक व खेळाडूंच्या अडचणी आणि समस्यांवर चर्चा करण्यात आली.
बैठकीस महा सायकल पोलो असोसिएशनचे सचिव संजय तिजारे, आंतरराष्ट्रीय सायकल पोलो खेळाडू श्रीकांत साखरकर, प्रशिक्षक मोहित खोब्रागडे, पदाधिकारी महेंद्रजी कावडे यांच्यासह मोठ्या संख्येने पालक व खेळाडू उपस्थित होते. कार्यक्रमाची प्रस्तावना नागपूर जिल्हा सायकल पोलो असोसिएशनचे सचिव उत्तम इटनकर यांनी केली. आगामी निवड चाचणीचे महत्त्व स्पष्ट करून सर्व पात्र खेळाडूंनी मोठ्या संख्येने सहभागी व्हावे, असे आवाहन त्यांनी केले.
भारतीय सायकल पोलो महासंघाच्या मार्गदर्शनाखाली ही राज्यस्तरीय निवड चाचणी होणार असून, चन्नावार सर, आंतरराष्ट्रीय सायकल पोलो खेळाडू मिलिंद पटले आणि राष्ट्रीय खेळाडू चंद्रकांत तिजारे यांच्या मार्गदर्शनाखाली निवड प्रक्रिया पार पडणार आहे. आगामी राष्ट्रीय स्पर्धेसाठी महाराष्ट्राचा सक्षम संघ तयार करण्याच्या दृष्टीने खेळाडूंनी शिस्त, मेहनत आणि पूर्ण तयारीनिशी निवड चाचणीत सहभागी व्हावे, असे आवाहन करण्यात आले. खेळाडूंच्या प्रगतीसाठी पालक, प्रशिक्षक आणि संघटनेचा समन्वय महत्त्वाचा असून, सर्वांनी एकजुटीने प्रयत्न करून सायकल पोलो खेळाला नवी उंची देऊया, असे उत्तम इटनकर यांनी सांगितले. बैठकीच्या शेवटी त्यांनी उपस्थित पालक, खेळाडू, प्रशिक्षक व पदाधिकाऱ्यांचे आभार मानले.
