लोकतंत्र मिरर
रत्नागिरी : रत्नागिरी जिल्ह्यातील शिळ गावाजवळ गुरुवारी सकाळी दोन एसटी बसची समोरासमोर जोरदार धडक होऊन भीषण अपघात झाला. या दुर्घटनेत ११ विद्यार्थी गंभीर जखमी झाले असून त्यांच्यावर रत्नागिरी जिल्हा शासकीय रुग्णालयात उपचार सुरू आहेत. सुदैवाने या अपघातात कोणतीही जीवितहानी झालेली नाही.
मिळालेल्या माहितीनुसार, सकाळच्या सुमारास प्रवाशांनी खचाखच भरलेल्या दोन एसटी बस शिळ गावाच्या परिसरातून एकमेकांच्या समोरून येत होत्या. याचवेळी दोन्ही बसची जोरदार धडक झाली. धडकेचा आवाज इतका मोठा होता की परिसरातील नागरिक तातडीने घटनास्थळी धावले. अपघातानंतर काही काळ घटनास्थळी गोंधळाचे वातावरण निर्माण झाले होते.अपघातानंतर बसमधील जखमी प्रवाशांना आणि विद्यार्थ्यांना बाहेर काढण्यासाठी स्थानिक नागरिकांनी तत्परता दाखवत मदतकार्य सुरू केले. त्यानंतर प्रशासन आणि बचाव पथक घटनास्थळी दाखल झाले. जखमी ११ विद्यार्थ्यांना तातडीने रुग्णवाहिकांच्या माध्यमातून रत्नागिरी जिल्हा शासकीय रुग्णालयात दाखल करण्यात आले. डॉक्टरांकडून त्यांच्यावर आवश्यक उपचार सुरू असून सर्वांची प्रकृती स्थिर असल्याची माहिती समोर आली आहे.
घटनेची माहिती मिळताच पोलीस, एसटी महामंडळाचे अधिकारी आणि प्रशासनातील कर्मचारी घटनास्थळी पोहोचले. अपघातग्रस्त बसची पाहणी करत वाहतूक सुरळीत करण्यासाठी आवश्यक उपाययोजना करण्यात आल्या. या अपघातामुळे काही काळ वाहतुकीवर परिणाम झाला होता. या घटनेची माहिती समोर येताच जखमी विद्यार्थ्यांच्या पालकांमध्ये चिंतेचे वातावरण निर्माण झाले. मात्र कोणतीही जीवितहानी झाली नसून सर्व विद्यार्थ्यांवर उपचार सुरू असल्याने पालकांना काहीसा दिलासा मिळाला आहे. दरम्यान, या अपघाताचे नेमके कारण काय, याचा तपास पोलीस करत आहेत.
