लोकतंत्र मिरर
पुणे : पुण्यातील घोरपडे पेठेत शुक्रवारी भरदिवसा पोलिस चौकीसमोरच झालेल्या गोळीबारामुळे परिसरात एकच खळबळ उडाली. दुचाकीवरून आलेल्या हल्लेखोरांनी एका तरुणावर सलग तीन गोळ्या झाडल्या. या हल्ल्यात ख्वाजा उद्दीन नाजीर शेख उर्फ नुरु शेख गंभीर जखमी झाला असून त्याच्यावर रुग्णालयात उपचार सुरू आहेत. सध्या त्याची प्रकृती स्थिर असल्याची माहिती पोलिसांनी दिली आहे.
मिळालेल्या माहितीनुसार, दुपारी सुमारे १२ वाजण्याच्या सुमारास ही घटना घडली. हल्लेखोरांनी गोळीबार करून घटनास्थळावरून पळ काढला. प्राथमिक तपासात हा हल्ला पूर्ववैमनस्यातून झाल्याचे समोर आले आहे. घटनेची माहिती मिळताच पुणे पोलिसांनी तातडीने तपास सुरू केला. पोलिसांनी पाठलाग करून मुख्य आरोपी सुजल सुनील परदेशी याला ताब्यात घेतले. त्यानंतर अवघ्या २० मिनिटांत आणखी दोघांना अटक करण्यात आली. या जलद कारवाईमुळे पोलिसांनी गुन्ह्याची उकल करण्यात यश मिळवले. भरदिवसा आणि पोलिस चौकीसमोर घडलेल्या या घटनेमुळे परिसरात काही काळ भीतीचे वातावरण निर्माण झाले होते. पोलिसांकडून या प्रकरणाचा पुढील तपास सुरू असून हल्ल्यामागील नेमके कारण शोधले जात आहे.
