लोकतंत्र मिरर
Nasrapur Case Update : पुणे जिल्ह्यातील नसरापूर येथे घडलेल्या अल्पवयीन मुलीवरील अत्याचार आणि हत्या प्रकरणात न्यायालयाने महत्त्वाचा निकाल दिला आहे. संपूर्ण राज्याला हादरवून सोडणाऱ्या या प्रकरणातील आरोपी भीमराव कांबळे याला पुणे जिल्हा व सत्र न्यायालयाने दोषी ठरवले आहे.या प्रकरणात आरोपीने एका अल्पवयीन मुलीवर अत्याचार करून तिची हत्या केल्याचा आरोप होता. न्यायालयाने सुनावणीदरम्यान सादर करण्यात आलेले पुरावे आणि युक्तिवाद विचारात घेत आरोपीविरोधातील आरोप सिद्ध झाल्याचे नमूद केले.
निकाल सुनावताना न्यायालयाने आरोपीला त्याच्या कृत्याची जाणीव करून देणारे शब्द उच्चारल्याचेही न्यायालयीन प्रक्रियेदरम्यान पाहायला मिळाले. मात्र, त्यानंतरही आरोपीकडून स्वतःचा बचाव करण्याचा प्रयत्न करण्यात आला.दरम्यान, या प्रकरणात आरोपीला कोणती शिक्षा सुनावण्यात यावी यावर न्यायालयात युक्तिवाद सुरू आहे. सरकारी पक्षाने हा अत्यंत गंभीर आणि अमानुष स्वरूपाचा गुन्हा असल्याचे सांगत आरोपीला कठोरात कठोर शिक्षा देण्याची मागणी केली आहे. आरोपीच्या वर्तनातून त्याला आपल्या कृत्याबद्दल कोणताही पश्चाताप दिसून येत नसल्याचेही सरकारी पक्षाने न्यायालयाच्या निदर्शनास आणून दिले.
या प्रकरणाच्या निकालाकडे राज्यभरातील नागरिकांचे लक्ष लागले होते. आता दोषी ठरल्यानंतर आरोपीला नेमकी कोणती शिक्षा सुनावली जाणार, याबाबत सर्वांचे लक्ष न्यायालयाच्या पुढील निर्णयाकडे लागले आहे.
