लोकतंत्र मिरर
अमरावती | राज माहोरे प्रतिनिधी
अमरावती. राष्ट्रीय आरोग्य अभियान, मुंबईचे आयुक्त तथा अभियान संचालक संजय काटकर यांनी शुक्रवार, दि. २३ रोजी अमरावती जिल्ह्याचा दौरा करून जिल्ह्यातील आरोग्य सेवांचा सविस्तर आढावा घेतला. या दौऱ्यादरम्यान त्यांनी जिल्हा स्त्री रुग्णालय, विभागीय संदर्भ सेवा रुग्णालय आणि प्राथमिक आरोग्य केंद्र, शिराळा येथे भेट देऊन उपलब्ध आरोग्य सुविधा, रुग्णांना दिल्या जाणाऱ्या सेवा आणि विविध आरोग्य अभियानांच्या अंमलबजावणीची पाहणी केली.
प्राथमिक आरोग्य केंद्र, शिराळा येथे आयुक्त संजय काटकर यांनी आशा स्वयंसेविकांशी संवाद साधून त्यांच्या कामकाजाची माहिती घेतली. ग्रामीण भागातील नागरिकांपर्यंत आरोग्य सेवा पोहोचविण्यात आशा स्वयंसेविकांची भूमिका महत्त्वाची असल्याचे त्यांनी नमूद केले. दैनंदिन कामकाज अधिक सुलभ होण्यासाठी आणि ऑनलाइन नोंदी प्रभावीपणे करता याव्यात, यासाठी सर्व आशा स्वयंसेविकांना टॅब उपलब्ध करून देण्याचे आश्वासन त्यांनी दिले. तसेच त्यांना एकसमान गणवेश देण्याबाबतही सकारात्मक भूमिका व्यक्त केली.
यावेळी मोबाईलच्या माध्यमातून आरोग्यविषयक ऑनलाइन नोंदी कशा केल्या जातात, याची त्यांनी प्रत्यक्ष माहिती घेतली. संबंधित नोंदी करून दाखविण्याच्या सूचनाही त्यांनी दिल्या. त्यामुळे डिजिटल आरोग्य व्यवस्थेच्या अंमलबजावणीची प्रत्यक्ष पडताळणी करण्यात आली.
आरोग्य केंद्रात उपचारासाठी आलेल्या रुग्णांशी संवाद साधत आयुक्तांनी उपचारांची गुणवत्ता, उपलब्ध वैद्यकीय सुविधा आणि आरोग्य कर्मचाऱ्यांच्या सेवांबाबत माहिती जाणून घेतली. यावेळी रुग्णांनी मिळणाऱ्या उपचारांबद्दल समाधान व्यक्त करत वैद्यकीय अधिकारी आणि आरोग्य कर्मचारी चांगल्या प्रकारे सेवा देत असल्याचे सांगितले.
या भेटीदरम्यान एका कर्करोगग्रस्त रुग्णाने प्राथमिक आरोग्य केंद्र, शिराळा येथील वैद्यकीय अधिकारी डॉ. हर्षा गोहत्रे यांच्या उपचारांबद्दल कृतज्ञता व्यक्त केली. योग्य मार्गदर्शन आणि वेळेत मिळालेल्या उपचारांमुळे आपले प्राण वाचल्याची भावना या रुग्णाने व्यक्त केली.
ग्रामीण भागातील आरोग्य केंद्रांमध्ये वेळेवर उपचार, योग्य वैद्यकीय मार्गदर्शन आणि रुग्णांशी संवेदनशीलतेने संवाद साधणे किती महत्त्वाचे आहे, हे या अनुभवातून अधोरेखित झाले. आयुक्तांनीही रुग्णाच्या अनुभवाची दखल घेतली.
या दौऱ्यावेळी सहाय्यक संचालक (वैद्यकीय), अकोला मंडळाचे डॉ. तरंगतुषार वारे, जिल्हा आरोग्य अधिकारी डॉ. प्रवीण पारिसे, अतिरिक्त जिल्हा आरोग्य अधिकारी डॉ. हर्षल क्षिरसागर, माता व बाल संगोपन अधिकारी डॉ. पराग राठोड, जिल्हा शल्य चिकित्सक डॉ. निरवणे, निवासी वैद्यकीय अधिकारी डॉ. संदीप हेडाऊ, अतिरिक्त जिल्हा आरोग्य अधिकारी डॉ. आठवले, जिल्हा हिवताप अधिकारी डॉ. प्रियंका निकोसे, जिल्हा विस्तार व माध्यम अधिकारी वनिता शिंदे यांच्यासह विविध विभागांतील अधिकारी व कर्मचारी उपस्थित होते.
या दौऱ्यामुळे जिल्ह्यातील आरोग्य सुविधांची प्रत्यक्ष स्थिती, आरोग्य कर्मचाऱ्यांच्या अडचणी, रुग्णांचे अनुभव आणि डिजिटल आरोग्य सेवांच्या अंमलबजावणीचा आढावा घेण्यात आला. आशा स्वयंसेविकांना टॅब आणि एकसमान गणवेश उपलब्ध करून देण्याच्या आश्वासनामुळे त्यांच्या दैनंदिन कामकाजाला मदत होण्याची अपेक्षा व्यक्त केली जात आहे.
