लोकतंत्र मिरर
घरगुती एलपीजी सिलेंडर वापरणाऱ्या ग्राहकांच्या मनात सध्या एकच प्रश्न आहे – जून महिना संपायला अवघे काही दिवस शिल्लक असताना सिलेंडरच्या दरात पुन्हा काही बदल झाला आहे का? दर महिन्याच्या पहिल्या तारखेला तेल कंपन्यांकडून एलपीजी सिलेंडरचे नवे दर जाहीर केले जात असल्याने ग्राहकांचे लक्ष या घडामोडीकडे लागलेले असते.
जून महिन्याच्या सुरुवातीला व्यावसायिक वापरासाठीच्या एलपीजी सिलेंडरच्या दरांमध्ये बदल करण्यात आला होता. मात्र घरगुती ग्राहकांना त्याचा फारसा फायदा झालेला नव्हता. काही शहरांमध्ये किरकोळ बदल झाले असले तरी सर्वसाधारणपणे घरगुती सिलेंडरच्या दरात मोठा फरक पडलेला नाही.
सध्या दिल्लीमध्ये १४.२ किलोच्या घरगुती एलपीजी सिलेंडरची किंमत ८५३ रुपये आहे. कोलकाता आणि चेन्नईमध्ये ग्राहकांना एका सिलेंडरसाठी ८८० रुपये मोजावे लागत आहेत. तर मुंबईमध्ये घरगुती सिलेंडरचा दर ९४१.५० रुपयांवर कायम आहे. दुसरीकडे, व्यावसायिक ग्राहकांसाठी वापरल्या जाणाऱ्या १९ किलोच्या कमर्शिअल एलपीजी सिलेंडरचे दर तुलनेने अधिक आहेत. मुंबईमध्ये या सिलेंडरची किंमत ३,०६७.५० रुपये इतकी आहे. इतर महानगरांमध्ये स्थानिक कर आणि वाहतूक खर्चानुसार दर वेगवेगळे आहेत.याशिवाय ५ किलोच्या फ्री ट्रेड एलपीजी सिलेंडरच्या दरातही यापूर्वी वाढ करण्यात आली होती. दिल्लीमध्ये या सिलेंडरची किंमत सुमारे ८२१.५० रुपयांपर्यंत पोहोचली असून हे दर १ जून २०२६ पासून लागू आहेत.
एलपीजी सिलेंडरच्या किंमतींवर आंतरराष्ट्रीय बाजारातील कच्च्या तेलाचे दर, गॅसच्या जागतिक किंमती, डॉलरच्या तुलनेत रुपयाचे मूल्य तसेच वाहतूक खर्चाचा थेट परिणाम होत असतो. त्यामुळे जागतिक बाजारातील चढ-उतारांचा परिणाम भारतीय ग्राहकांनाही जाणवतो.दरम्यान, जून महिन्याच्या अखेरच्या आठवड्यापर्यंत घरगुती एलपीजी सिलेंडरच्या दरात कोणताही नवीन बदल जाहीर करण्यात आलेला नसल्याने ग्राहकांना सध्या तरी दिलासा मिळाला आहे. १ जुलै रोजी जाहीर होणाऱ्या नव्या दरांकडे आता सर्वांचे लक्ष लागले आहे.
