लोकतंत्र मिरर
मुंबई : मुंबईतील बेस्ट कर्मचाऱ्यांचा संप दुसऱ्या दिवशीही कायम असल्याने शहरातील सार्वजनिक वाहतूक व्यवस्थेवर मोठा परिणाम झाला आहे. बेस्टच्या बहुतांश बस रस्त्यावर उतरल्या नसल्याने लाखो प्रवाशांना पर्यायी वाहतुकीचा आधार घ्यावा लागत असून लोकल रेल्वे आणि मेट्रो स्थानकांवर मोठी गर्दी दिसून येत आहे.
बेस्टच्या विविध प्रलंबित मागण्यांसह खासगीकरणाला विरोध आणि उपक्रमाच्या आर्थिक व्यवस्थेबाबतच्या मुद्द्यांवर कामगार संघटनांनी बेमुदत संप पुकारला आहे. प्रशासन आणि कर्मचारी प्रतिनिधींमध्ये चर्चा झाली असली तरी कोणताही ठोस तोडगा निघू शकला नाही. त्यामुळे संप सुरू ठेवण्याच्या भूमिकेवर संघटना ठाम आहेत. संपामुळे बेस्टची सेवा जवळपास पूर्णपणे विस्कळीत झाली आहे. हजारो बसपैकी अत्यल्प बस रस्त्यावर धावल्या, मात्र काही ठिकाणी घडलेल्या दगडफेक आणि तोडफोडीच्या घटनांमुळे त्या सेवेलाही फटका बसला. बसचे नुकसान झाल्याची माहिती प्रशासनाकडून देण्यात आली आहे.
मुंबईकरांसाठी दैनंदिन प्रवासाचा महत्त्वाचा आधार असलेली बेस्ट सेवा बंद पडल्याने नागरिकांचे मोठे हाल होत आहेत. कार्यालये, शाळा आणि इतर कामांसाठी बाहेर पडणाऱ्या प्रवाशांना रिक्षा आणि टॅक्सीचा आधार घ्यावा लागत असून त्यासाठी जादा खर्चही करावा लागत आहे. आधीच वाढत्या महागाईचा सामना करणाऱ्या नागरिकांवर यामुळे अतिरिक्त आर्थिक भार पडत आहे. दरम्यान, विविध कामगार संघटनांकडून संपाला पाठिंबा वाढत असल्याने परिस्थिती आणखी गंभीर बनली आहे. प्रशासन आणि संघटनांमध्ये पुढील चर्चेतून मार्ग निघतो का, याकडे आता मुंबईकरांचे लक्ष लागले आहे.
