लोकतंत्र मिरर
शेतकऱ्यांसाठी दिलासादायक बातमी समोर आली आहे. केंद्र सरकारच्या प्रधानमंत्री किसान सन्मान निधी (PM Kisan Yojana) योजनेच्या २४ व्या हप्त्याबाबत महत्त्वाची अपडेट समोर आली आहे. शेतीच्या वाढत्या खर्चात आर्थिक आधार मिळावा यासाठी सुरू करण्यात आलेल्या या योजनेतून पात्र शेतकऱ्यांना दरवर्षी ६ हजार रुपयांची आर्थिक मदत दिली जाते. पीएम किसान योजनेचे आतापर्यंत २३ हप्ते शेतकऱ्यांच्या खात्यात जमा झाले आहेत. २३ वा हप्ता २० जून २०२६ रोजी शेतकऱ्यांच्या खात्यावर पाठवण्यात आला होता. आता शेतकऱ्यांना २४ व्या हप्त्याची प्रतीक्षा आहे.
ऑक्टोबर २०२६ मध्ये जमा होण्याची शक्यता
पीएम किसान योजनेअंतर्गत हप्ते साधारण चार महिन्यांच्या अंतराने शेतकऱ्यांच्या खात्यावर जमा केले जातात. त्यामुळे २४ वा हप्ता ऑक्टोबर २०२६ मध्ये जमा होण्याची शक्यता आहे. या हप्त्यात पात्र शेतकऱ्यांच्या खात्यावर २ हजार रुपयांची रक्कम पाठवली जाऊ शकते.
हप्ता मिळवण्यासाठी प्रक्रिया पूर्ण करा
२४ व्या हप्त्याचा लाभ मिळवण्यासाठी शेतकऱ्यांनी आवश्यक प्रक्रिया पूर्ण करणे गरजेचे आहे. यामध्ये आधार सीडिंग, जमिनीच्या कागदपत्रांची पडताळणी आणि फेस ऑथेंटिकेशन यांचा समावेश आहे. ही माहिती अपडेट नसल्यास हप्त्याचा लाभ मिळण्यास अडचणी येऊ शकतात.
काही शेतकरी लाभापासून राहू शकतात वंचित
योजनेच्या नियमांचे पालन न करणाऱ्या शेतकऱ्यांना पुढील हप्त्याचा लाभ मिळणार नाही. तसेच एकाच कुटुंबातील एकापेक्षा जास्त सदस्य योजनेचा लाभ घेत असल्यास किंवा पात्रतेच्या अटी पूर्ण होत नसल्यास लाभ थांबवला जाऊ शकतो. त्यामुळे २४ व्या हप्त्याची वाट पाहणाऱ्या शेतकऱ्यांनी आपली कागदपत्रे आणि योजनेतील माहिती वेळेत तपासून घेणे आवश्यक आहे.
