लोकतंत्र मिरर
मुंबई : मराठी रंगभूमीवर प्रचंड लोकप्रिय ठरलेले आणि साहित्यविश्वात विशेष स्थान मिळवलेले ‘गारंबीचा बापू’ हे अजरामर नाटक आता पुन्हा एकदा चित्रपटाच्या माध्यमातून प्रेक्षकांच्या भेटीला येणार आहे. या आगामी चित्रपटाची घोषणा नुकत्याच प्रदर्शित झालेल्या पोस्टरद्वारे करण्यात आली असून, त्याने सोशल मीडियावर चांगलीच चर्चा रंगवली आहे. ज्येष्ठ साहित्यिक ना. पेंडसे यांच्या लेखणीतून साकारलेल्या या गाजलेल्या कथेला आधुनिक तंत्रज्ञान आणि भव्य सिनेमॅटिक मांडणीची जोड देण्यात आली आहे. त्यामुळे नव्या पिढीतील प्रेक्षकांनाही ही कथा नव्या स्वरूपात अनुभवता येणार आहे.
‘गारंबीचा बापू – गोष्ट एका वाघाची’ असे या चित्रपटाचे नाव असून, पोस्टरमध्ये धगधगत्या आगीसमोर उभ्या असलेल्या एका बलदंड व्यक्तीची पाठमोरी आकृती पाहायला मिळते. पोस्टरमधील रहस्यमयता आणि संघर्षाची झलक पाहून चित्रपटाबद्दलची उत्सुकता आणखी वाढली आहे.या चित्रपटाचे दिग्दर्शन गुरुप्रसाद इनामदार यांनी केले आहे. याआधी त्यांनी ‘निर्णय’, ‘हिरकणी’ आणि ‘योद्धा’ यांसारख्या चित्रपटांचे दिग्दर्शन केले आहे. तर पटकथा आणि संवाद लेखनाची जबाबदारी शशी पेंडसे यांनी सांभाळली आहे.
नाटक आणि साहित्यप्रेमींमध्ये ‘गारंबीचा बापू’च्या नव्या सिनेमाविषयी आतापासूनच चर्चा सुरू झाली आहे. या क्लासिक कथेचे आधुनिक रूप प्रेक्षकांना कितपत भावते, याकडे आता सर्वांचे लक्ष लागले आहे.
