लोकतंत्र मिरर
अमरावती,राज माहोरे (प्रतिनिधी) : अमरावती विभागीय शिक्षक मतदारसंघाच्या आगामी निवडणुकीच्या पार्श्वभूमीवर शिक्षक महासंघाचे संस्थापक अध्यक्ष चंद्रशेखर भोयर यांना जुनी पेन्शन संघटनेने पाठिंबा जाहीर केला आहे. जुनी पेन्शन संघटनेचे राज्याध्यक्ष वितेश खांडेकर यांनी पत्रकार परिषदेत या पाठिंब्याची घोषणा केली.
शिक्षक व कर्मचाऱ्यांच्या जुन्या पेन्शनच्या प्रश्नावर सातत्याने भूमिका मांडणारे नेतृत्व म्हणून चंद्रशेखर भोयर यांना संघटनेच्या वतीने पाठिंबा देत असल्याचे खांडेकर यांनी स्पष्ट केले. आगामी शिक्षक मतदारसंघाच्या निवडणुकीच्या पार्श्वभूमीवर संघटनेने घेतलेल्या या भूमिकेमुळे शिक्षक-कर्मचारी संघटनांमधील घडामोडींकडे लक्ष लागले आहे.
पेन्शनचा मुद्दा केंद्रस्थानी
जुनी पेन्शन योजना लागू करण्याचा प्रश्न हा राज्यातील शिक्षक व कर्मचाऱ्यांसाठी सातत्याने चर्चेचा विषय राहिला आहे. या प्रश्नासह शिक्षक आणि कर्मचाऱ्यांच्या विविध प्रलंबित मागण्यांवर पुढील काळात अधिक समन्वयाने काम करण्याबाबत पत्रकार परिषदेत चर्चा झाली. संघटनेच्या पदाधिकाऱ्यांनी शिक्षक व कर्मचाऱ्यांच्या प्रश्नांना प्रभावीपणे मांडण्यासाठी संघटनात्मक पातळीवर समन्वयाची गरज व्यक्त केली. त्याच पार्श्वभूमीवर चंद्रशेखर भोयर यांना पाठिंबा जाहीर करण्यात आल्याचे सांगण्यात आले.
विभागातील पदाधिकाऱ्यांची उपस्थिती
या पत्रकार परिषदेला जुनी पेन्शन संघटनेचे विभागीय अध्यक्ष मिलिंद सोळंके, वाशीम जिल्हाध्यक्ष निलेश कानळे, अकोला जिल्हाध्यक्ष तथा विभाग प्रमुख (खाजगी शाळा) अमोल गुळदे, यवतमाळ जिल्हाध्यक्ष तथा आंदोलन प्रमुख नदीम पटेल, बुलढाणा जिल्हाध्यक्ष नंदकिशोर सुसर तसेच शिक्षक महासंघाचे संस्थापक अध्यक्ष चंद्रशेखर भोयर उपस्थित होते.
निवडणुकीच्या पार्श्वभूमीवर घडामोडींना वेग
अमरावती विभागीय शिक्षक मतदारसंघाची निवडणूक जवळ येत असताना विविध शिक्षक संघटना आणि संभाव्य उमेदवारांकडून मोर्चेबांधणी सुरू आहे. अशा परिस्थितीत जुनी पेन्शन संघटनेने चंद्रशेखर भोयर यांना जाहीर केलेला पाठिंबा ही निवडणूकपूर्व घडामोड ठरली आहे. दरम्यान, शिक्षक-कर्मचाऱ्यांच्या पेन्शनसह विविध प्रश्नांवर पुढील काळात संघटना आणि भोयर यांच्या नेतृत्वाखाली समन्वयाने काम करण्याबाबत यावेळी चर्चा झाली.
