लोकतंत्र मिरर
गडचिरोली : गडचिरोली जिल्ह्याच्या विकासावरून सुरू असलेल्या राजकीय आरोप-प्रत्यारोपांच्या पार्श्वभूमीवर भारतीय जनता पक्षाच्या वतीने गुरुवारी पत्रकार परिषद घेण्यात आली. काँग्रेसकडून करण्यात येणारे आरोप वस्तुस्थितीला धरून नसून, जिल्ह्यात सुरू असलेल्या विकासकामांवर राजकीय हेतूने प्रश्नचिन्ह उपस्थित केले जात असल्याचा दावा भाजपच्या वतीने करण्यात आला.
माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोकजी नेते यांच्या गडचिरोली येथील निवासी कार्यालयात झालेल्या पत्रकार परिषदेत जिल्ह्यातील विविध विकासकामांची माहिती देण्यात आली. मुख्यमंत्री तथा गडचिरोली जिल्ह्याचे पालकमंत्री देवेंद्रजी फडणवीस यांच्या नेतृत्वाखाली जिल्ह्याच्या विकासाला व्यापक दिशा मिळाल्याचे भाजपने म्हटले.
‘नक्षलग्रस्त जिल्हा’ या ओळखीपासून विकासाच्या दिशेने
गडचिरोलीची पूर्वी नक्षलग्रस्त व मागास जिल्हा अशी ओळख होती. मात्र, गेल्या काही वर्षांत सुरक्षा व्यवस्था मजबूत करण्यासोबतच रस्ते, पूल, दळणवळण, प्रशासकीय सुविधा आणि विविध विकास प्रकल्पांना गती मिळाल्याचा दावा भाजपने केला. दुर्गम व आदिवासीबहुल भागांना मुख्य प्रवाहाशी जोडण्यासाठी रस्ते व पुलांच्या माध्यमातून संपर्कव्यवस्था मजबूत करण्यावर भर देण्यात आल्याचे सांगण्यात आले.
‘स्टील हब’च्या दिशेने वाटचाल
सूरजागड परिसरातील लोहखनिजाच्या उपलब्धतेच्या पार्श्वभूमीवर गडचिरोलीत स्टील उद्योगाचा विस्तार करण्यासाठी राज्य सरकारकडून प्रयत्न सुरू असल्याचे भाजपने नमूद केले. सूरजागड व कोनसरी परिसरातील औद्योगिक प्रकल्पांमुळे स्थानिक पातळीवर रोजगाराच्या संधी निर्माण होण्याची प्रक्रिया सुरू असल्याचे सांगण्यात आले. स्थानिक युवकांना कौशल्य प्रशिक्षण देऊन औद्योगिक रोजगाराच्या संधी उपलब्ध करून देण्याची गरजही यावेळी व्यक्त करण्यात आली.
आरोग्य सुविधांच्या विस्तारावर भर
शासकीय वैद्यकीय महाविद्यालयामुळे वैद्यकीय शिक्षणासोबतच तज्ज्ञ वैद्यकीय सेवांच्या विस्ताराला मदत होत असल्याचे भाजपने सांगितले. दुर्गम भागातील नागरिकांना वेळेत वैद्यकीय सेवा मिळावी यासाठी १०८ रुग्णवाहिका तसेच भौगोलिक अडचणी असलेल्या भागांत बोट ॲम्बुलन्ससारख्या सुविधांचा वापर करण्यात येत असल्याचा दावा करण्यात आला.
वडसा–गडचिरोली रेल्वे प्रकल्पाचा मुद्दा
गडचिरोलीच्या औद्योगिक व आर्थिक विकासासाठी रेल्वे कनेक्टिव्हिटी महत्त्वाची असल्याचे भाजपने म्हटले. वडसा–गडचिरोली रेल्वे प्रकल्पासह रस्ते, पूल आणि इतर दळणवळणाच्या सुविधा जिल्ह्याच्या भविष्यातील विकासासाठी महत्त्वपूर्ण ठरणार असल्याची भूमिका मांडण्यात आली.
‘६० वर्षांत काय केले?’; भाजपचा काँग्रेसला सवाल
काँग्रेसच्या दीर्घकालीन सत्ताकाळावरही भाजपच्या वक्त्यांनी प्रश्न उपस्थित केले. काँग्रेसच्या दीर्घकाळाच्या सत्ताकाळात गडचिरोलीच्या विकासाला अपेक्षित गती मिळाली नाही, असा आरोप भाजपने केला. दशकानुदशके प्रलंबित राहिलेल्या प्रश्नांवर काम सुरू झाले असताना प्रत्येक विकासकामात राजकारण शोधण्यापेक्षा वस्तुस्थिती जनतेसमोर मांडावी, अशी भूमिका भाजपच्या वतीने व्यक्त करण्यात आली.
पंतप्रधान मोदींना डॉ. अशोकजी नेते यांच्या शुभेच्छा
पंतप्रधान नरेंद्रजी मोदी यांच्या वाढदिवसानिमित्त डॉ. अशोकजी नेते यांनी त्यांना शुभेच्छा दिल्या. देशसेवेसाठी समर्पित असलेल्या पंतप्रधानांना उत्तम आरोग्य व दीर्घायुष्य लाभावे आणि त्यांच्या नेतृत्वाखाली देशसेवेचे कार्य अधिक व्यापक व्हावे, अशी भावना त्यांनी व्यक्त केली.
‘गडचिरोलीकडे फडणवीसांचे विशेष लक्ष’
मुख्यमंत्री तथा पालकमंत्री देवेंद्रजी फडणवीस यांचे गडचिरोलीच्या विकासाकडे विशेष लक्ष असल्याचे डॉ. नेते यांनी सांगितले. राज्याच्या नेतृत्वाची जबाबदारी सांभाळतानाच गडचिरोलीतील स्थानिक प्रश्न समजून घेण्यासाठी प्रत्यक्ष मुक्काम करून काम करण्याची त्यांची भूमिका महत्त्वाची असल्याचे त्यांनी नमूद केले.
विकासकामांची आकडेवारी जनतेसमोर मांडणार
गडचिरोली जिल्ह्यात झालेल्या व सुरू असलेल्या विकासकामांची क्षेत्रनिहाय माहिती, मंजूर निधी, प्रकल्पांची सद्यस्थिती आणि रोजगाराच्या संधी यांची माहिती जनतेसमोर मांडण्याचा निर्धार भाजपने व्यक्त केला. रस्ते, पूल, रेल्वे, उद्योग, आरोग्य, शिक्षण, सिंचन, पर्यटन आणि दळणवळण या क्षेत्रांचा एकत्रित विकास झाल्यास जिल्ह्याच्या सामाजिक व आर्थिक परिवर्तनाला वेग मिळू शकतो, अशी भूमिका यावेळी मांडण्यात आली.
पत्रकार परिषदेला भाजपा जिल्हाध्यक्ष रमेशजी बारसागडे, आदिवासी मोर्चा प्रदेशाध्यक्ष तथा माजी आमदार डॉ. देवरावजी होळी, माजी जिल्हाध्यक्ष प्रशांत वाघरे, नगराध्यक्षा अँड. प्रणोती सागर निंबोडकर, किसान मोर्चा प्रदेश सचिव रमेश भुरसे, महिला मोर्चा प्रदेश सचिव रेखाताई डोळस, भाजपच्या नेत्या चंदाताई कोडवते, शहराध्यक्ष तथा न.प. सभापती सिम्माताई कन्नमवार, जिल्हा उपाध्यक्ष अरुणजी हरडे, ज्येष्ठ नेते डॉ. भारत खटी, कामगार आघाडीचे जिल्हाध्यक्ष सुधाकरजी पेटकर, संजय बारापात्रे, सलीम शेख यांच्यासह भाजप पदाधिकारी व कार्यकर्ते उपस्थित होते.
