लोकतंत्र मिरर
नागपूर, सतीश तोडासे ( प्रतिनिधी ) : बदलत्या तंत्रज्ञानाच्या युगात ‘जनरेशन अल्फा’च्या विद्यार्थ्यांच्या गरजा लक्षात घेऊन इंग्रजी भाषा अध्यापनाच्या पद्धतींमध्येही बदल करणे आवश्यक आहे. सर्जनशीलता, संवादकौशल्य आणि भाषिक क्षमता विकसित करण्यासाठी आधुनिक व विद्यार्थी-केंद्रित अध्यापन पद्धतींचा वापर करावा, असे मार्गदर्शन व्हीएनआयटी, नागपूरच्या सामाजिक विज्ञान विभागातील इंग्रजीचे प्राध्यापक डॉ. प्रांतिक बॅनर्जी यांनी केले.
सरस्वती विद्यालय हायस्कूल आणि कनिष्ठ महाविद्यालय, शंकरनगर, नागपूर येथे २९ ऑगस्ट रोजी शिक्षक विकास कार्यक्रम (FDP) आयोजित करण्यात आला. ‘Teaching English to Generation Alpha: Creativity, Communication and Competence’ या विषयावर डॉ. बॅनर्जी यांनी शिक्षकांना मार्गदर्शन केले. या सत्रात त्यांनी जनरेशन अल्फाच्या विद्यार्थ्यांसाठी प्रभावी ठरणाऱ्या आधुनिक अध्यापन पद्धती, सर्जनशीलता, संवादकौशल्य तसेच भाषिक क्षमता विकसित करण्याच्या विविध तंत्रांची माहिती दिली. बदलत्या पिढीच्या गरजा समजून घेऊन भाषा अध्यापनात आवश्यक बदल कसे करता येतील, याबाबत त्यांनी शिक्षकांना मौल्यवान अंतर्दृष्टी दिली.
डॉ. बॅनर्जी यांचे सत्र अत्यंत संवादात्मक आणि माहितीपूर्ण ठरले. त्यांच्या मार्गदर्शनामुळे आधुनिक पिढीतील विद्यार्थ्यांना इंग्रजी भाषा अधिक प्रभावीपणे शिकविण्यासाठी शिक्षकांना नवी दिशा मिळाली. कार्यक्रमाच्या प्रारंभी दक्षिण भारतीय शिक्षण संस्थेचे सहसचिव डॉ. सुरेश चारी यांनी रोपटे देऊन प्रमुख वक्ते डॉ. प्रांतिक बॅनर्जी यांचे स्वागत केले. मुख्याध्यापिका डॉ. रेशमी उमेश, उपमुख्याध्यापिका शैली अय्यर, पर्यवेक्षक राहुल घोडे व शैलेंद्र ठाकूर तसेच पूर्व-प्राथमिक विभागाच्या पर्यवेक्षिका वीणा नारायणन यांच्या मार्गदर्शनाखाली या कार्यक्रमाचे आयोजन करण्यात आले.
