लोकतंत्र मिरर
अमरावती, राज माहोरे ( प्रतिनिधी ) : गेल्या महिनाभरापासून पावसाचा खंड पडल्यामुळे सोयाबीन, कापूस, तूर आणि संत्रा पिकांवर परिणाम झाला आहे. त्यामुळे उत्पादन घटण्याची शक्यता असून, नुकसानग्रस्त शेतकऱ्यांना नुकसानभरपाई मिळवून देण्यासाठी शासनाकडे पाठपुरावा करण्यात येईल, अशी माहिती अमरावती जिल्ह्याचे पालकमंत्री चंद्रशेखर बावनकुळे यांनी दिली.
पालकमंत्री बावनकुळे यांनी तिवसा तालुक्यातील शेतकऱ्यांच्या बांधावर जाऊन पिकांची प्रत्यक्ष पाहणी केली. यावेळी त्यांनी शेतकऱ्यांशी संवाद साधून त्यांच्या अडचणी जाणून घेतल्या. पावसाचा खंड पडल्यामुळे सोयाबीन पिकाचे मोठे नुकसान झाले असून, शेतकऱ्यांना आर्थिक संकटाचा सामना करावा लागत आहे. पावसाअभावी सोयाबीनचे दाणे परिपक्व अवस्थेत आलेले नसल्याने उत्पादनावर परिणाम होण्याची शक्यता आहे. त्यामुळे तातडीने नुकसानग्रस्त शेतपिकांची पाहणी करून पंचनामे करण्याचे निर्देश देण्यात आले आहेत. संपर्काची समस्या असल्यास पंचनामे ऑफलाइन करण्याच्या सूचनाही देण्यात आल्या आहेत. पाहणीचा अहवाल शासनाकडे सादर करून शेतकऱ्यांना आवश्यक मदत मिळवून देण्यासाठी पाठपुरावा करण्यात येणार असल्याचे बावनकुळे यांनी सांगितले.
दरम्यान, कापूस, तूर आणि संत्रा पिकांना सिंचनाची व्यवस्था झाल्यास काही दिवस पिके तग धरू शकतात. मात्र, काही भागात कृषीपंपांचा वीजपुरवठा खंडित झाल्याने शेतकऱ्यांना अडचणी येत असल्याच्या तक्रारी यावेळी करण्यात आल्या. याची दखल घेत बावनकुळे यांनी शेताच्या बांधावरूनच संबंधित अधिकाऱ्यांशी दूरध्वनीवरून संपर्क साधून वीजपुरवठा सुरळीत करण्याचे निर्देश दिले. नादुरुस्त सोलार कृषीपंपांची दोन दिवसांत दुरुस्ती करण्याच्या सूचनाही कंत्राटदारांना देण्यात आल्या. शेतकऱ्यांच्या पाठीशी शासन ठामपणे उभे असून, नुकसानग्रस्त शेतकऱ्यांना आवश्यक ती मदत मिळवून देण्यासाठी प्रयत्न करण्यात येतील, असे बावनकुळे यांनी सांगितले. गेल्या वर्षीही १,१४० कोटी रुपयांची नुकसानभरपाई देण्यात आली असून, शेतकऱ्यांना कर्जमुक्ती आणि प्रोत्साहनपर अनुदान देण्यात येत असल्याचे त्यांनी नमूद केले.
यावेळी आमदार प्रताप अडसड, आमदार प्रवीण पोटे पाटील, सह जिल्हाधिकारी आशिष येरेकर, जिल्हा परिषदेचे मुख्य कार्यकारी अधिकारी सत्यम गांधी, तहसीलदार मयूर कळसे, नायब तहसीलदार आशीष नागरे यांच्यासह संबंधित अधिकारी, पदाधिकारी आणि शेतकरी उपस्थित होते.
