लोकतंत्र मिरर
‘वर्क फ्रॉम होम’चा पर्याय स्वीकारा आणि इंधन बचतीसाठी पुढाकार घ्या, असे महत्त्वाचे आवाहन पंतप्रधान नरेंद्र मोदी यांनी देशवासियांना केले आहे. जागतिक स्तरावर वाढलेल्या तणावपूर्ण परिस्थितीमुळे ऊर्जा बचतीचे महत्त्व अधिक वाढले असून पेट्रोल, डिझेल आणि गॅसचा वापर जपून करण्याची गरज त्यांनी अधोरेखित केली. ऊर्जा बचत ही फक्त पर्यावरणाशी संबंधित बाब नसून देशाच्या आर्थिक स्थैर्याशीही थेट जोडलेली असल्याचे मोदी यांनी स्पष्ट केले. याच पार्श्वभूमीवर कंपन्या आणि संस्थांनी शक्य असेल तेथे ‘वर्क फ्रॉम होम’ किंवा ‘हायब्रिड वर्क मॉडेल’चा अवलंब करण्याचा विचार करावा, असेही त्यांनी सुचवले.
कोरोना महामारीदरम्यान आयटी, मीडिया, बँकिंग, कन्सल्टिंग आणि अनेक डिजिटल क्षेत्रांमध्ये घरून काम करण्याची पद्धत मोठ्या प्रमाणावर स्वीकारली गेली होती. या मॉडेलमुळे कर्मचाऱ्यांचा रोजचा प्रवास कमी झाला, इंधनाची बचत झाली आणि शहरांमधील वाहतूक कोंडी तसेच प्रदूषणातही लक्षणीय घट दिसून आली. आता पुन्हा एकदा इंधन बचतीच्या दृष्टीने हा पर्याय प्रभावी ठरू शकतो, असे सरकारचे मत आहे.
भारत मोठ्या प्रमाणावर कच्च्या तेलाची आयात करतो. त्यामुळे इंधनाचा वापर कमी झाला तर तेल आयातीवरील खर्च कमी होऊन परकीय चलन साठ्यावरचा दबावही कमी होऊ शकतो. कंपन्यांनाही कार्यालयीन वीज, देखभाल आणि इतर सुविधांवरील खर्चात बचत करता येईल. मात्र उत्पादन, रुग्णालये, वाहतूक आणि किरकोळ विक्रीसारख्या क्षेत्रांमध्ये प्रत्यक्ष उपस्थिती आवश्यक असल्याने सर्वच क्षेत्रांसाठी हा पर्याय शक्य नसल्याचे तज्ज्ञ सांगतात. तरीही डिजिटल क्षेत्रांसाठी ‘हायब्रिड वर्क पॉलिसी’ भविष्यात मोठी संधी ठरू शकते.
