लोकतंत्र मिरर
मुंबई : पेट्रोलमध्ये २० टक्के इथेनॉल (E20) मिश्रणाची अंमलबजावणी झाल्यानंतर आता केंद्र सरकार डिझेलसाठीही पर्यायी जैवइंधनाचा पर्याय विकसित करण्याच्या तयारीत आहे. केंद्रीय रस्ते वाहतूक आणि महामार्ग मंत्री नितीन गडकरी यांनी डिझेलमध्ये १५ टक्क्यांपर्यंत आयसोब्युटेनॉल ब्लेंडिंग करण्याचा विचार सुरू असल्याची माहिती दिली. या उपक्रमामागील उद्देश कच्च्या तेलावरील आयात अवलंबित्व कमी करणे, ऊर्जा स्वावलंबनाला चालना देणे आणि पर्यावरणपूरक इंधनाचा वापर वाढवणे हा आहे.
डिझेलमध्ये इथेनॉलऐवजी आयसोब्युटेनॉलच का?
गडकरी यांनी सांगितले की, इथेनॉल थेट डिझेलमध्ये मिसळणे तांत्रिकदृष्ट्या शक्य नसल्याने त्यावर प्रक्रिया करून आयसोब्युटेनॉल तयार केले जात आहे. हे इंधन डिझेलशी अधिक सुसंगत असून भविष्यात प्रभावी पर्याय ठरू शकते.
आयसोब्युटेनॉलचे फायदे काय?
सरकारच्या मते, आयसोब्युटेनॉलमध्ये ऊर्जा निर्मिती क्षमता अधिक असून ते इंजिनच्या कार्यक्षमतेला पूरक ठरते. तसेच पारंपरिक डिझेलच्या तुलनेत कार्बन उत्सर्जन कमी करण्यासही मदत होऊ शकते. गडकरी यांनी १०० टक्के इथेनॉल आणि आयसोब्युटेनॉलवर जनरेटर यशस्वीरीत्या चालवून दाखवण्यात आल्याचेही सांगितले. यामुळे भविष्यात या इंधनावर आधारित तंत्रज्ञान विकसित करण्याचा मार्ग अधिक सुकर होईल, असा विश्वास व्यक्त करण्यात आला.
ऊर्जा स्वावलंबनाकडे आणखी एक पाऊल
केंद्र सरकारने यापूर्वी पेट्रोलमध्ये E20 मिश्रणाला प्रोत्साहन दिल्यानंतर आता डिझेलमध्ये आयसोब्युटेनॉल मिश्रणाचा पर्याय पुढे आणण्याची तयारी सुरू केली आहे. यामुळे स्वच्छ इंधनाचा वापर वाढण्याबरोबरच कच्च्या तेलावरील अवलंबित्व कमी करण्याच्या दिशेने आणखी एक महत्त्वाचे पाऊल उचलले जाणार असल्याचे मानले जात आहे.
