लोकतंत्र मिरर
मुंबई, रमेश शेंडे ( प्रतिनिधी ) : पोईसर जिमखाना येथे राष्ट्रीय क्रीडा दिन उत्साहात साजरा करण्यात आला. यावेळी विविध क्रीडा प्रकारांत उल्लेखनीय कामगिरी करणाऱ्या प्रतिभावान युवा खेळाडूंचा गौरव करण्यात आला. क्रीडा क्षेत्रातील गुणवत्तेला प्रोत्साहन देणे तसेच युवकांनी शिक्षणाबरोबरच खेळातही सक्रिय सहभाग घ्यावा, या उद्देशाने कार्यक्रमाचे आयोजन करण्यात आले होते.
कार्यक्रमाला संबोधित करताना जनसेवक तथा माजी खासदार गोपाल शेट्टी यांनी खेळाडूंच्या जडणघडणीत पालकांची भूमिका अत्यंत महत्त्वाची असल्याचे सांगितले. पालकांनी मुलांना शिक्षणाबरोबरच क्रीडा क्षेत्रात सहभागी होण्यासाठी प्रोत्साहन व पाठबळ द्यावे, असे आवाहन त्यांनी केले. “शिक्षण आणि खेळ हे दोन्ही हातात हात घालून पुढे गेले पाहिजेत. खेळामुळे मुलांचा व्यक्तिमत्त्व विकास आणि सर्वांगीण प्रगती घडते,” असे शेट्टी यांनी सांगितले. उत्तर मुंबई जिल्हा क्रीडा अधिकारी सायली जाधव यांनी व्यक्तिमत्त्व विकास आणि जीवनातील आव्हानांना सामोरे जाण्यासाठी खेळांचे महत्त्व अधोरेखित केले. नियमित क्रीडा सहभागामुळे बांधिलकी, एकाग्रता आणि समर्पण हे गुण विकसित होतात. हे गुण जीवनाच्या प्रत्येक क्षेत्रात यश मिळविण्यास उपयुक्त ठरतात, असे त्यांनी नमूद केले.
कार्यक्रमाचे विशेष आकर्षण म्हणजे सुनील वालावलकर लिखित ‘बदलते क्रीडा जगत’ या पुस्तकाचे प्रकाशन. यावेळी वालावलकर यांनी नवोदित खेळाडूंना प्रोत्साहन देण्यासाठी पोईसर जिमखाना आणि गोपाल शेट्टी यांच्या प्रयत्नातून उभारण्यात आलेल्या क्रीडा सुविधा व पायाभूत व्यवस्थेचे कौतुक केले. कार्यक्रमात विविध क्रीडा प्रकारांत उल्लेखनीय यश संपादन करणाऱ्या युवा खेळाडूंचा विशेष सत्कार करण्यात आला. यावेळी ज्येष्ठ पत्रकार व संपादक पद्मभूषण देशपांडे, पोईसर जिमखानाचे अध्यक्ष मुकेश भंडारी, उपाध्यक्ष करुणाकर एस. शेट्टी यांच्यासह मान्यवर, पदाधिकारी, खेळाडू, प्रशिक्षक, पालक आणि जिमखान्याचे सदस्य मोठ्या संख्येने उपस्थित होते.
युवा खेळाडूंचे अभिनंदन करताना गोपाल शेट्टी यांनी सातत्याने मेहनत करण्याचे, मोठे ध्येय ठेवण्याचे आणि आपल्या कामगिरीने महाराष्ट्रासह देशाचे नाव उज्ज्वल करण्याचे आवाहन केले. राष्ट्रीय क्रीडा दिनाचा हा सोहळा क्रीडा संस्कृतीला प्रोत्साहन देणे, युवा प्रतिभेला घडविणे आणि भावी पिढीतील खेळाडूंना अधिकाधिक संधी उपलब्ध करून देण्याच्या पोईसर जिमखान्याच्या वचनबद्धतेचे प्रतीक ठरला.
