लोकतंत्र मिरर
पिंपरी-चिंचवड, राजन शेळके ( प्रतिनिधी): धर्मवीर छत्रपती संभाजी महाराज यांच्या ‘स्टॅच्यू ऑफ हिंदुभूषण’ला रविवारी, दि. ४ ऑक्टोबर २०२६ रोजी विश्वविक्रमी ढोल-ताशा मानवंदना देण्यात आली. हिंदुभूषण स्मारक ट्रस्टचे अध्यक्ष तथा आमदार महेश लांडगे यांच्या संकल्पनेतून हा सोहळा आयोजित करण्यात आला. एकाच वेळी सर्वाधिक ढोल वाजविण्याचा विश्वविक्रम या सोहळ्यात नोंदविण्यात आला असून, या कामगिरीची ‘गिनीज वर्ल्ड रेकॉर्ड्स’मध्ये नोंद झाल्याची माहिती आयोजकांनी दिली.
हिंदुभूषण स्मारक ट्रस्ट, पिंपरी-चिंचवड आणि ढोल-ताशा महासंघ, महाराष्ट्र राज्य यांच्या संयुक्त विद्यमाने या सोहळ्याचे आयोजन करण्यात आले होते. महाराष्ट्रभरातील विविध ढोल-ताशा पथकांनी यामध्ये सहभाग घेतला.
गिनीज रेकॉर्डच्या तयारीसाठी ढोल-ताशा पथकांची विशेष मांडणी करण्यात आली होती. विविध पथकांतील हजारो वादकांनी एकत्र येत महाराष्ट्राच्या रणवाद्य परंपरेची ताकद दाखवून दिली. ढोल-ताशांच्या गगनभेदी निनादातून धर्मवीर छत्रपती संभाजी महाराजांच्या शौर्याला मानवंदना अर्पण करण्यात आली.
