लोकतंत्र मिरर
नांदेड. शहरातील होळी-सराफा भागातील चंद्रकांत प्लाझा येथे सुरू असलेल्या कथित अवैध वेश्या व्यवसायावर पोलिसांनी छापा टाकून ३३ वर्षीय महिलेची सुटका केली. या प्रकरणी एका महिलेसह तिच्या मुलाविरुद्ध गुन्हा दाखल करण्यात आला असून, पोलिसांनी रोख रक्कम आणि चार मोबाईल फोन असा एकूण ७३ हजार रुपयांचा मुद्देमाल जप्त केला आहे.
शहरातील अनैतिक मानवी व्यापाराला आळा घालण्यासाठी पोलीस अधीक्षक डॉ. निलाभ रोहन यांच्या आदेशानुसार विशेष मोहीम राबविण्यात येत आहे. या मोहिमेदरम्यान गुरुवारी इतवारा विभागाच्या पोलिसांना होळी-सराफा भागातील चंद्रकांत प्लाझामधील घर क्रमांक ०१९-०५९ येथे अवैध वेश्या व्यवसाय सुरू असल्याची गुप्त माहिती मिळाली.
या माहितीच्या आधारे स्थानिक गुन्हे शाखा आणि अनैतिक मानवी वाहतूक प्रतिबंधक कक्षाच्या पथकाने संयुक्त कारवाईचे नियोजन केले. दोन सरकारी पंच आणि बनावट ग्राहकाच्या मदतीने सापळा रचून संबंधित ठिकाणी छापा टाकण्यात आला.
पोलिसांच्या प्राथमिक चौकशीत दिपाली किशोर उदावंत (वय ५१) आणि तिचा मुलगा नितीन किशोर उदावंत (वय ३०), दोघेही रा. चंद्रकांत प्लाझा, हे एका महिलेला अधिक पैशांचे आमिष दाखवून वेश्या व्यवसायास प्रवृत्त करत असल्याची माहिती समोर आली. तसेच नितीन हा ग्राहक आणण्याचे काम करत होता आणि ग्राहकांकडून मिळणाऱ्या पैशांपैकी निम्मी रक्कम आरोपी स्वतःकडे ठेवत असल्याचे तपासात निष्पन्न झाल्याचे पोलिसांनी सांगितले.
छाप्यादरम्यान पोलिसांनी पीडित महिलेची सुटका केली. घटनास्थळावरून रोख रक्कम आणि चार मोबाईल फोन जप्त करण्यात आले असून, या प्रकरणाचा पुढील तपास सुरू आहे.
ही कारवाई पोलीस अधीक्षक डॉ. निलाभ रोहन यांच्या आदेशानुसार, अपर पोलीस अधीक्षक सूरज गुरव यांच्या मार्गदर्शनाखाली आणि इतवारा विभागाचे उपविभागीय पोलीस अधिकारी प्रशांत शिंदे यांच्या नेतृत्वाखाली करण्यात आली.
शहरातील अनैतिक मानवी व्यापाराविरोधात पोलिसांनी सुरू केलेल्या मोहिमेमुळे अशा प्रकारच्या अवैध व्यवसायांवर कारवाई करण्यास वेग आला आहे.
