लोकतंत्र मिरर
नवापूर येथील एमआयडीसी परिसरात रविवारी मध्यरात्री भीषण आग लागल्याने एकच खळबळ उडाली. टेक्स्टाईल उत्पादन करणाऱ्या एका मोठ्या कंपनीला अचानक आग लागल्याने काही क्षणांतच संपूर्ण परिसर धुराने व्यापून गेला. आगीची तीव्रता इतकी भीषण होती की तब्बल 15 किलोमीटर अंतरावरूनही काळ्या धुराचे मोठे लोट स्पष्टपणे दिसत होते.
मिळालेल्या प्राथमिक माहितीनुसार, कंपनीच्या उत्पादन विभागातून आग लागल्याचा अंदाज व्यक्त करण्यात येत आहे. आग लागताच कंपनीतील कामगार आणि कर्मचाऱ्यांना तातडीने बाहेर काढण्यात आले. सुदैवाने या घटनेत कोणतीही जीवितहानी झाल्याचे वृत्त नाही. मात्र कंपनीतील यंत्रसामग्री, कच्चा माल आणि तयार वस्तूंचे मोठ्या प्रमाणावर नुकसान झाले आहे.
घटनेची माहिती मिळताच नंदुरबार तसेच आसपासच्या भागातील अग्निशमन दलाच्या अनेक गाड्या घटनास्थळी दाखल झाल्या. अग्निशमन कर्मचाऱ्यांनी अनेक तास शर्थीचे प्रयत्न करून आगीवर नियंत्रण मिळवण्याचा प्रयत्न केला. आगीमुळे परिसरात मोठ्या प्रमाणावर धूर पसरल्याने नागरिकांमध्ये भीतीचे वातावरण निर्माण झाले होते.
स्थानिक प्रशासन आणि पोलिसांनी परिसरात सुरक्षा व्यवस्था वाढवली असून नागरिकांना घटनास्थळापासून दूर राहण्याचे आवाहन करण्यात आले आहे. आगीचे नेमके कारण अद्याप स्पष्ट झाले नसले तरी शॉर्टसर्किटमुळे ही दुर्घटना घडल्याची शक्यता वर्तवली जात आहे.
या घटनेमुळे नवापूर एमआयडीसीतील औद्योगिक सुरक्षेचा प्रश्न पुन्हा एकदा ऐरणीवर आला आहे. प्रशासनाकडून घटनेची सखोल चौकशी सुरू करण्यात आली आहे.
