लोकतंत्र मिरर
नांदेड, रविंद्र औंढेकर (विशेष प्रतिनिधी) : महाराष्ट्र शासनाच्या गृह विभागाने जारी केलेल्या आदेशांच्या अनुषंगाने जिल्ह्यातील पोलीस निरीक्षकांच्या बदल्या करण्यात आल्या आहेत. नांदेड ग्रामीणचे ‘दबंग’ समजले जाणारे पोलीस निरीक्षक ओमकांत चिंचोलकर यांची पोलीस नियंत्रण कक्षात बदली करण्यात आली असून, त्यांच्या रिक्त जागेवर नियंत्रण कक्षातील अशोक जाधव यांना पाठवण्यात आले आहे.
पोलीस अधीक्षक कार्यालयातून मंगळवारी आदेश काढण्यात आले. त्यात संबंधित अधिकाऱ्यांना त्यांच्या नवीन पदस्थापनेच्या ठिकाणी कार्यभार स्वीकारण्याचे निर्देश देण्यात आले आहेत. या आदेशानुसार, पोलीस निरीक्षक सुभाष उन्हाळे यांची विमानतळ सुरक्षा येथून पोलीस ठाणे नायगाव येथे पदस्थापना करण्यात आली आहे. नायगावचे पोलीस निरीक्षक अमोल भगत यांना अर्धापूर येथे पाठवण्यात आले असून, अर्धापूरचे पोलीस निरीक्षक महादेव मांजरमकर यांची विमानतळ सुरक्षा विभागात बदली करण्यात आली आहे. बदली झालेल्या सर्व निरीक्षकांनी नवीन पदस्थापनेच्या ठिकाणी पदभार स्वीकारून त्याबाबतचा अनुपालन अहवाल सादर करावा, असे आदेशात म्हटले आहे.
