लोकतंत्र मिरर
पुणे : वाढत्या महागाईचा परिणाम आता सर्वसामान्यांच्या रोजच्या गरजेच्या दुधावरही झाला आहे. कात्रज डेअरीच्या दूध दरात प्रतिलिटर २ रुपयांची वाढ करण्याचा निर्णय घेण्यात आला आहे. यासोबतच विविध दुग्धजन्य पदार्थांच्या दरातही १० टक्क्यांपर्यंत वाढ करण्यात येणार आहे. हे सुधारित दर ११ ऑगस्टपासून लागू होणार आहेत.
वाढत्या उत्पादन खर्चामुळे दरवाढ
दूध उत्पादक व प्रक्रिया कल्याणकारी संघाच्या सभासदांची बैठक पुणे जिल्हा सहकारी दूध उत्पादक संघ मर्यादित (कात्रज डेअरी) येथे झाली. संघाचे अध्यक्ष गोपाळराव म्हस्के यांच्या अध्यक्षतेखाली झालेल्या या बैठकीत दूध व्यवसायातील वाढत्या उत्पादन खर्चाचा आढावा घेण्यात आला. त्यानंतर दूध आणि दुग्धजन्य पदार्थांच्या विक्री दरात वाढ करण्याचा निर्णय घेण्यात आला. गेल्या काही काळात डिझेलच्या दरात प्रतिलिटर सुमारे १० रुपयांनी, तर साखरेच्या दरात प्रतिकिलो १२ रुपयांनी वाढ झाली आहे. याशिवाय पॅकिंग साहित्याच्या खर्चात ३० टक्क्यांहून अधिक वाढ झाली आहे. दूध खरेदीच्या दरातही वाढ झाल्याने उत्पादन आणि वाहतुकीचा खर्च वाढला आहे.
ग्राहकांच्या खिशावर वाढणार भार
उत्पादन, पॅकिंग, वाहतूक तसेच इतर खर्चाचा ताळमेळ राखण्यासाठी दूध विक्री दरात वाढ करण्याचा निर्णय घेण्यात आला आहे. त्यामुळे आता कात्रज डेअरीचे दूध खरेदी करणाऱ्या ग्राहकांना प्रत्येक लिटरसाठी २ रुपये अधिक मोजावे लागणार आहेत. दुधाबरोबरच विविध दुग्धजन्य पदार्थांच्या किमतीतही उत्पादनानुसार १० टक्क्यांपर्यंत वाढ केली जाणार आहे. त्यामुळे दूध, पनीर आणि इतर दुग्धजन्य पदार्थांच्या खरेदीसाठी ग्राहकांच्या घरगुती बजेटवर अतिरिक्त भार पडण्याची शक्यता आहे.
दूध उत्पादकांना योग्य मोबदला देण्याचा प्रयत्न
दूध व्यवसायातील वाढता खर्च आणि दूध उत्पादकांना मिळणारा मोबदला यामध्ये समतोल राखण्यासाठी ही दरवाढ करण्यात आल्याचे सांगण्यात आले. वाढत्या खर्चाच्या पार्श्वभूमीवर डेअरीसमोर आर्थिक आव्हान निर्माण झाले होते.
बैठकीला २० प्रतिनिधी उपस्थित
या बैठकीला प्रमुख सहकारी आणि खासगी दूध संघांचे सुमारे २० प्रतिनिधी उपस्थित होते. यावेळी पुणे जिल्हा सहकारी दूध उत्पादक संघाचे नवनिर्वाचित अध्यक्ष अरुण सीताराम चांभारे यांचा दूध उत्पादक व प्रक्रिया कल्याणकारी संघाच्या वतीने सत्कार करण्यात आला. तसेच अॅनालॉग पनीरवरील बंदीच्या प्रक्रियेत सहकार्य केल्याबद्दल आमदार विक्रम पाचपुते यांचे आभार व्यक्त करण्यात आले. ११ ऑगस्टपासून कात्रज डेअरीचे सुधारित दर लागू होणार असल्याने आता रोजच्या दूध खरेदीसाठी पुणेकरांना अधिक पैसे मोजावे लागणार आहेत.
