लोकतंत्र मिरर
राजन शेळके, (प्रतिनिधी ): आज दिनांक १६ ऑक्टोबर २०२६, शारदीय नवरात्र महोत्सव श्री शके १९४८ च्या षष्ठीला करवीर निवासिनी श्री महालक्ष्मी अर्थात आई अंबाबाई स्कंदमाता रूपात सजली आहेत. जगदंबेच्या नवदुर्गांपैकी देवीचे पाचवे रूप म्हणजे स्कंदमाता. स्कंद म्हणजे कार्तिकेय. कार्तिकेयाचा जन्म हा देवीच्या लीलांमधील एक विशेष प्रसंग आहे.
तारकासुराचा वध शिवाचा पुत्र करेल, या वरदानाला अनुसरून देवांनी शिव-पार्वतीचा विवाह व्हावा यासाठी आटोकाट प्रयत्न केले. प्रत्यक्षात ज्यावेळी शिव-पार्वतीच्या मिलनाची वेळ आली, तेव्हा इंद्राच्या मनात असूया आणि घाई दोन्ही निर्माण झाली. त्याला वाटले की, साक्षात शिवाचे तेज आणि पार्वतीचे बीज यातून एकत्र आकाराला येणारा पुत्र जगात सर्वश्रेष्ठ असेल. म्हणून त्याने अग्नीकरवी शिवतेज हिरावून आणले. प्रचंड दुःखी झालेल्या पार्वतीने देवांना तुम्हाला औरस संतती होणार नाही, असाही शाप दिला. शेवटी शिवाचे तेज गंगेने धारण केले. काही काळ गंगेच्या उदरात राहिल्यानंतर हे तेज कृत्तिका नक्षत्राच्या सहा देवींनी स्वतःकडे धारण केले. पण लोकापवादाच्या भीतीने त्यांनी ते तेज गंगेच्या काठावर असलेल्या शरकांडाच्या वनात टाकून दिले. त्याच ठिकाणी अवतीर्ण झाला षण्मुख अर्थात सहा मुखांचा स्कंद म्हणजेच कार्तिकेय. कृत्तिकांपासून जन्मला म्हणून तो कार्तिकेय.
नेमक्या त्याच क्षणी आकाशातून विमानमार्गे जाताना या बाळाचा आक्रोश ऐकून पार्वतीच्या उरात पान्हा दाटला. तिने भगवान शंकरांना विनंती करून या बाळाजवळ जाण्यासाठी तयार केले. त्या पुत्राला पाहताच पार्वतीच्या मनामध्ये अपार माया दाटून आली. तिने चटकन या बाळाला छातीशी धरले. तिचे स्तन्य पिऊन हा बालक शक्तिशाली झाला. तिच्याच हातातील शक्ती आयुध घेऊन त्याने तारकासुराचा वध केला. शिवाचा ज्येष्ठ पुत्र म्हणून तो देवांचा सेनापती झाला; पण आईसाठी मात्र तो कायमच लाडके बाळ राहिला.अशा या कुमाराला मांडीवर घेतलेले देवीचे रूप म्हणजे स्कंदमाता. मनापासून हाक मारणाऱ्या प्रत्येकाला ती आपले करते, याचे हे उत्तम उदाहरण आहे.अशी केवळ एका हाकेला धावून जाणारी स्कंदमाता आपल्या सर्वांचे असेच रक्षण करो, ही तिच्या चरणी प्रार्थना.
