लोकतंत्र मिरर
पुणे : ऋषीपंचमीनिमित्त श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळातर्फे आयोजित अथर्वशीर्ष पठण सोहळ्यात ३५ हजारांहून अधिक महिलांनी सहभागी होत गणरायाला नमन केले. ‘ओम नमस्ते गणपतये’, ‘मोरया मोरया’ आणि ‘ओम गं गणपतये नमः’च्या जयघोषाने परिसर भक्तिमय झाला.
ट्रस्टच्या १३४ व्या वर्षातील गणेशोत्सवानिमित्त उत्सव मंडपासमोर गणेशोत्सवातील प्रेम मंदिराच्या प्रतिकृतीसमोर हा सोहळा पार पडला. या उपक्रमाचे यंदा ४१वे वर्ष होते. पावसाचे वातावरण असतानाही मध्यरात्री २ वाजल्यापासून महिलांनी पारंपरिक वेशात कार्यक्रमासाठी उपस्थित राहण्यास सुरुवात केली. कार्यक्रमाच्या प्रारंभी महिलांनी शंखनाद केला. त्यानंतर ओंकार जप आणि गणेशगीताच्या सादरीकरणाने वातावरण मंत्रमुग्ध झाले. महिलांनी सामूहिक अथर्वशीर्ष पठण करून गणरायाला नमन केले. ‘मोरया मोरया दगडूशेठ मोरया’च्या जयघोषाने उत्साहाला उधाण आले. दगडूशेठच्या उत्सव मंडपापासून नाना वाड्यापर्यंतच्या परिसरात महिलांची मोठी गर्दी झाली होती. महाआरतीने कार्यक्रमाची सांगता झाली.
यावेळी पुण्याच्या महापौर मंजुषा नागपुरे, विभागीय आयुक्त शीतल तेली-उगले, ट्रस्टचे अध्यक्ष सुनील रासने, कोषाध्यक्ष महेश सूर्यवंशी, शुभांगी भालेराव, अर्चना भालेराव, सुवर्णयुग तरुण मंडळाचे सौरभ रायकर, यतिश रासने, मंगेश सूर्यवंशी, राजाभाऊ घोडके, सचिन आखाडे, अंकुश रासने यांच्यासह पदाधिकारी व कार्यकर्ते उपस्थित होते. परिमंडळ १ चे पोलीस उपायुक्त कृषिकेश रावले यांचा यावेळी सन्मान करण्यात आला. महापौर मंजुषा नागपुरे म्हणाल्या, “उत्सवात महिला तयार होऊन येते किंवा उत्सवाची तयारी करते तेव्हाच तो उत्सव पूर्ण होतो. संपूर्ण पुणे शहरासाठी शक्ती आणि ऊर्जा या माध्यमातून निर्माण झाली आहे.” मुंबई, सातारा, कोल्हापूर, लातूर आदी शहरांमधूनही महिला या उपक्रमासाठी सहभागी झाल्या. अर्चना भालेराव आणि प्रा. डॉ. गौरी कुलकर्णी यांनी सूत्रसंचालन केले.
