लोकतंत्र मिरर
MPSC Drug Inspector Exam Paper Leak : देशभरात नीट (NEET) पेपरफुटी प्रकरणाची चर्चा सुरू असतानाच आता महाराष्ट्र लोकसेवा आयोगाच्या (MPSC) औषध निरीक्षक (Drug Inspector) भरती परीक्षेवरही प्रश्नचिन्ह उपस्थित झाले आहे. परीक्षेपूर्वी प्रश्नपत्रिकेतील अनेक प्रश्न WhatsApp वर व्हायरल झाल्याचा आरोप काही उमेदवारांनी केला असून, संपूर्ण भरती प्रक्रियेची निष्पक्ष चौकशी करण्याची मागणी करण्यात आली आहे.
तक्रारदार उमेदवारांनी महाराष्ट्र लोकसेवा आयोग (MPSC) आणि अन्न व औषध प्रशासन (FDA) विभागाकडे लेखी तक्रार दाखल केली आहे. 22 मार्च रोजी झालेल्या परीक्षेपूर्वी सोशल मीडियावर फिरणारे अनेक प्रश्न आणि प्रत्यक्ष प्रश्नपत्रिकेतील प्रश्नांमध्ये साम्य असल्याचा दावा त्यांनी केला आहे. याशिवाय, नंदुरबारमधून परीक्षेतील प्रश्न पुढे पाठवण्यात आल्याची चर्चा देखील समोर आली आहे. सुमारे 90 प्रश्न परीक्षेपूर्वीच लीक झाल्याचा गंभीर आरोप विद्यार्थ्यांनी केला असून, या संपूर्ण प्रकरणाची सखोल चौकशी करण्याची मागणी त्यांनी केली आहे.
MPSC चे स्पष्टीकरण
दरम्यान, महाराष्ट्र लोकसेवा आयोगाने पेपरफुटीचे आरोप फेटाळून लावले आहेत. या संदर्भात अन्न व औषध प्रशासनाकडे तक्रार प्राप्त झाली असून तिची पडताळणी केली जाणार असल्याचे आयोगाने स्पष्ट केले आहे. आयोगाने सांगितले की, प्रकरणाची सखोल चौकशी केली जाईल. मात्र, चौकशीत आरोपांमध्ये तथ्य आढळले नाही तर अफवा पसरवणाऱ्यांविरोधात कायदेशीर कारवाई करण्यात येईल.
