लोकतंत्र मिरर
दिल्ली : केंद्र सरकारच्या संभाव्य मंत्रिमंडळ विस्ताराबाबत राजकीय वर्तुळात चर्चांना वेग आला आहे. येत्या १७ जुलै रोजी केंद्रीय मंत्रिमंडळात फेरबदल होण्याची शक्यता व्यक्त केली जात असून, त्या पार्श्वभूमीवर उपमुख्यमंत्री एकनाथ शिंदे आज शिवसेनेच्या खासदारांसह दिल्ली दौऱ्यावर रवाना होत आहेत. केंद्रीय गृहमंत्री अमित शाह यांच्यासोबत त्यांची महत्त्वपूर्ण बैठक होणार असल्याची माहिती सूत्रांनी दिली आहे.
या बैठकीत केंद्रातील प्रतिनिधित्व, आगामी राजकीय रणनीती तसेच मंत्रिमंडळ विस्तारासंदर्भातील मुद्द्यांवर चर्चा होण्याची शक्यता वर्तवली जात आहे. शिवसेना शिंदे गटाचे खासदार श्रीकांत शिंदे यांच्या नावाची केंद्रीय मंत्रीपदासाठी जोरदार चर्चा सुरू असून, त्यांना कॅबिनेटमध्ये स्थान मिळण्याची शक्यता व्यक्त केली जात आहे. दरम्यान, काल झालेल्या भाजपच्या कोअर कमिटी बैठकीनंतर या चर्चांना अधिक बळ मिळाले आहे. बैठकीत अनेक वरिष्ठ नेते उपस्थित होते. विशेष म्हणजे भाजप नेते विनोद तावडे यांच्या उपस्थितीने राजकीय चर्चांना वेग आला. मुख्यमंत्री देवेंद्र फडणवीस यांच्या संभाव्य दिल्ली दौऱ्याबाबत सुरू असलेल्या चर्चांमुळेही या बैठकीकडे विशेष लक्ष वेधले गेले.
सूत्रांच्या माहितीनुसार, शिवसेना शिंदे गटाला केंद्रात एक कॅबिनेट मंत्री आणि एक राज्यमंत्री पद मिळू शकते. त्यामुळे पक्षातील अनेक खासदारांकडून मंत्रीपदासाठी प्रयत्न सुरू असल्याचे सांगितले जात आहे. राज्यमंत्रिपदासाठी खासदार ओमराजे निंबाळकर आणि खासदार संजय जाधव यांच्या नावांची चर्चा रंगली आहे. आज संध्याकाळी श्रीकांत शिंदे हे शिवसेनेच्या खासदारांसह चार्टर्ड विमानाने दिल्लीला रवाना होणार आहेत. रात्री एकनाथ शिंदे यांच्या नेतृत्वाखाली शिवसेनेच्या सर्व खासदारांची अमित शाह यांच्यासोबत बैठक होणार असल्याची माहिती आहे. या बैठकीनंतर मंत्रिमंडळ विस्ताराबाबतचे चित्र अधिक स्पष्ट होण्याची शक्यता व्यक्त केली जात आहे.
महायुतीतील जागावाटप, केंद्रातील प्रतिनिधित्व आणि आगामी राजकीय समीकरणांच्या पार्श्वभूमीवर १७ जुलै हा दिवस महाराष्ट्राच्या राजकारणासाठी महत्त्वाचा ठरू शकतो. मंत्रिमंडळ विस्ताराच्या निर्णयानंतर कोणत्या पक्षाच्या वाट्याला किती मंत्रिपदे येतात आणि कोणत्या नेत्याला संधी मिळते, याकडे राज्यातील राजकीय वर्तुळाचे लक्ष लागले आहे.
