लोकतंत्र मिरर
अहिल्यानगर ,राधेशाम कुलकर्णी (जिल्हा प्रमुख) : महावितरणमधील वीज कंत्राटी कामगारांच्या प्रलंबित मागण्यांवर ठोस निर्णय घ्यावा, या मागणीसाठी महाराष्ट्र वीज कंत्राटी कामगार संघ (संलग्न : भारतीय मजदूर संघ) यांच्यावतीने २७ ऑक्टोबर २०२६ रोजी आंदोलन करण्यात येणार आहे. या आंदोलनात राज्यातील सर्व वीज कंत्राटी कामगारांनी मोठ्या संख्येने सहभागी व्हावे, असे आवाहन कंत्राटी कामगार महासंघाचे जिल्हा सचिव सचिन पाटील यांनी केले आहे.
संघटनेच्या पदाधिकाऱ्यांनी १३ ऑक्टोबर रोजी मुंबई येथे मंत्रालय, प्रकाशगड, कामगार आयुक्त कार्यालय आणि वांद्रे पोलीस ठाणे येथे आंदोलनाची नोटीस सादर केली. तसेच ऊर्जा राज्यमंत्री मेघना बोर्डीकर यांची भेट घेऊन कामगारांच्या समस्यांवर कायमस्वरूपी तोडगा काढण्यासाठी मुख्यमंत्र्यांच्या उपस्थितीत बैठक घेण्याची मागणी केली. यावेळी भारतीय मजदूर संघाचे प्रदेश महामंत्री किरण मिलगीर, कंत्राटी कामगार महासंघाचे अध्यक्ष निलेश खरात, सचिव सचिन मेंगाळे आदी उपस्थित होते.
वारंवार आश्वासने मिळूनही मागण्यांवर प्रत्यक्ष कार्यवाही होत नसल्याने संघटनेने आंदोलनाची भूमिका घेतली आहे. आगामी आंदोलनासह पुढील टप्प्यांतही कामगारांनी संघटनेच्या अधिकृत सूचनांनुसार सक्रिय सहभाग नोंदवावा, असे आवाहन करण्यात आले आहे. “आता केवळ आश्वासने नकोत, तर ठोस निर्णय हवा,” अशी भूमिका मांडत कामगारांच्या हक्कांसाठी एकजुटीने लढा देण्याचे आवाहन संघटनेने केले आहे.
