लोकतंत्र मिरर
पुणे, राजन शेळके ( प्रतिनिधी ) : जागतिक रेबीज दिनानिमित्त पुणे महापालिकेच्या वतीने शहरातील भटक्या कुत्र्यांसाठी विशेष रेबीज लसीकरण मोहीम सुरू करण्यात आली आहे. यंदाच्या जागतिक रेबीज दिनाची अधिकृत संकल्पना ‘स्ट्रॉगर टूगेदर’ अशी आहे.
महापालिकेच्या १५ क्षेत्रीय कार्यालयांसाठी प्रत्येकी एक वाहन उपलब्ध करून देण्यात आले आहे. या वाहनांसोबत कुत्रे पकडणारे कर्मचारी, पशुवैद्यकीय अधिकारी आणि रेबीज लस उपलब्ध करून देण्यात आली आहे. याशिवाय दोन डिजिटल वाहने तसेच पाच परिमंडळांसाठी पाच निरीक्षण वाहने उपलब्ध आहेत. नागरिकांच्या तक्रारींचे निराकरण करण्यासाठी महापालिकेची स्वतंत्र पाच वाहनेही कार्यरत आहेत.
डब्ल्यूव्हीएस वर्ल्ड व्हेटरनरी सर्व्हिसेस संस्थेच्या माध्यमातून महापालिका कर्मचारी, अधिकारी, शाळा आणि सार्वजनिक ठिकाणी पथनाट्य, माहितीपत्रके आणि जनजागृती कार्यक्रम घेण्यात येत आहेत. सार्वजनिक ठिकाणी रेबीजविषयी जनजागृती करण्यात येत असून, कुत्रा चावल्यानंतर घ्यावयाची काळजी, रेबीजचा धोका आणि प्रतिबंधात्मक उपाय यांची माहिती नागरिकांना देण्यात येत आहे
