लोकतंत्र मिरर
नागपूर : इनर व्हील क्लब ऑफ नागपूर साऊथतर्फे सिकलसेल व थॅलेसेमिया या अनुवंशिक आजारांबाबत जनजागृती करण्यासाठी विशेष उपक्रम राबविण्यात आला. याअंतर्गत 21 सप्टेंबर रोजी गजानन कनिष्ठ महाविद्यालय, नागपूर येथे विद्यार्थ्यांसाठी तपासणी शिबिर आयोजित करण्यात आले होते. या शिबिरात एकूण 500 विद्यार्थ्यांची तपासणी करण्यात आली.
तपासणीत सिकलसेल पॉझिटिव्ह आढळलेल्या विद्यार्थ्यांसाठी तसेच त्यांच्या पालकांसाठी 30 ऑक्टोबर रोजी विशेष मार्गदर्शन व समुपदेशन सत्राचे आयोजन करण्यात आले. लोक कल्याण डायग्नॉस्टिक सेंटरचे संचालक डॉ. तुंगारे आणि डॉ. प्रशांत अन्सिंगकर यांनी सिकलसेल व थॅलेसेमियाचे स्वरूप, आहार, आवश्यक उपचार आणि घ्यावयाची काळजी याविषयी सविस्तर माहिती दिली. यावेळी पालकांना वैयक्तिक समुपदेशनही करण्यात आले.
क्लबच्या अध्यक्षा श्रीमती कविता दुरगकर यांनी पालकांशी संवाद साधताना सांगितले की, हे आजार अनुवंशिक असले तरी पालकांनी एकमेकांना दोष देण्याऐवजी मुलांच्या आरोग्याची योग्य काळजी घेणे आवश्यक आहे. मुलांना सुरक्षित आणि निरोगी भविष्य देण्यासाठी पालकांनी सजग राहावे. तसेच भारताला 2047 पर्यंत सिकलसेल व थॅलेसेमियामुक्त करण्याच्या राष्ट्रीय ध्येयासाठी क्लबतर्फे सातत्याने योगदान व सहकार्य देण्याचा संकल्पही त्यांनी व्यक्त केला.
या कार्यक्रमाला महाविद्यालयाचे उपप्राचार्य डॉ. अग्रवाल उपस्थित होते. कार्यक्रमाचे सूत्रसंचालन श्रीमती वाघ यांनी केले. इनर व्हील क्लबच्या ज्येष्ठ सदस्या डॉ. स्नेहल भावे, अनिता धुरवे आणि वैशाली फुलकर यांचीही उपस्थिती होती. पालकांच्या सक्रिय सहभागामुळे हा जनजागृती उपक्रम यशस्वी झाला.
